Чăваш енри хĕрарăмсен юхăмĕ вăй илсе пырать. Организаци самана таппинчен юлмасть, пуçаруллă утăмсем тăвать.

Тăрăшни, паллах, ыр çимĕç парать. Союз тĕрлĕ ÿсĕмри тата профессири хĕрарăмсене пĕр пĕрлĕхе пухма пулăшать. Кăçалхи ĕç планĕ те калăпăшлă. Çамрăк ăрура патриотизм туйăмне аталантарассине, промышленность предприятисенче хĕрарăм канашĕсене йĕркелессине, Телейлĕ ачалăх çулталăкĕпе килĕшÿллĕн мероприятисене ирттерессине пысăк тимлĕх уйăрĕç.

Пĕлтĕр хĕрарăмсен Союзĕн хастарĕсем «Кирли çинчен калаçусем» проекта хутшăннă. Обществăлла юхăмăн лидерĕсем республикăри шкулсенче класс сехечĕсем ирттернĕ, ятарлă çар операцине хутшăнакансемпе тĕлпулусем йĕркелеме пулăшнă. Ку пархатарлă ĕç малалла та тăсăлĕ, мĕншĕн тесен çĕршыв хÿтĕлевçисем пирки çамрăк ăрăвăн пĕлмеллех, вĕсенчен тĕслĕх илмеллех. Сăр тата Хусан хÿтĕлев чиккисене тунă паттăрсен ячĕсем халăх асĕнче ĕмĕрлĕх юлччăр тесе хĕрарăмсен Союзĕ малалла та тĕллевлĕ тимлет.

«Эпĕ - хĕрарăм» конкурс та пулĕ. Кăçал вăл виççĕмĕш хут иртĕ. 2022 çулта конкурса 500 хĕрарăм хутшăннă. «Хĕрарăма мухтар» фестивале йĕркелесси те ĕç планĕнче пур. Пĕлтĕр унта Шупашкарти тата Çĕнĕ Шупашкарти ултă предприятирен пултарулăх командисем хутшăннă.

Хĕрарăмсен обществăлла юхăмĕ пĕлтерĕшлĕ ĕçсене çамрăк çемьесене явăçтарĕ. Сывă пурнăçа пропагандăлас енĕпе сывлăх сыхлавĕн министерствин специалисчĕсемпе малалла та тачă çыхăнса ĕçлĕ. Хĕрарăмсен бизнес-сообществине те тимлĕхре тытĕç. Яллă тăрăхсенче тăрăшакан этемлĕхĕн черченкĕ çуррине пулăшма та манмĕç.

Хĕрарăмсен Союзĕн Вăрнар муниципаллă округĕнчи уйрăмĕ те тухăçлă тимлет. Обществăлла ĕçсене хутшăнакансен пуçарăвĕсем çынсен пурнăçне кăсăклăрах та пĕлтерĕшлĕрех тума пулăшаççĕ. Культура мероприятийĕсем, ыркăмăллăх марафонĕсем, патриотла акцисем, тĕлпулусем йĕркелеççĕ. Кăçал та пурнăçламалли ĕçсем чылай.

- Этемлĕхĕн черченкĕ çурри хастарлăхпа палăрса тăрать. Халăх фольклорĕн фестивальне, хĕрарăмсен спартакиадине ирттерме палăртатпăр. Телейлĕ ачалăх çулталăкĕнче çамрăк ăрăва та тимлĕх уйăрăпăр, пĕлтерĕшлĕ мероприятисем йĕркелĕпĕр, - пĕлтерчĕ хĕрарăмсен Союзĕн округри председателĕ Людмила Васильева.

Елена ПОРФИРЬЕВА.