Район çыннисем салтаксене пулăшас тесе пĕр чăмăра пĕрлешни савăнтарать. Çынсем уйрăмшарăн та, ушкăнпа та хамăр ентешсем аякри çĕрте кил ăшшине туйччăр тесе тăрăшаççĕ.

Пирĕн ĕçтешĕмĕр, пичет ĕçĕн ветеранĕ, 48 çул «Çĕнтерÿ çулĕ» хаçатпа типографийĕнче тĕп бухгалтерта тимленĕ Алисса Беляева, акă, ятарлă çар операцийĕ пуçлансан Донецкпа Луганск ачисем валли хăй çыхнă япаласене ăсатнă.

Мобилизациленнĕ ентешсене пулăшас чĕнĕве те вăл тÿрех ăша хывнă. Алĕçне ăстаскер, салтаксем валли вуншар мăшăр алсишпа нуски çыхнă. Унсăр пуçне, пулăшу центрне тумтир те çитерсе панă. Ырă чĕреллĕ çынсем районта чылай. Унчченхи номерсенче вĕсем çинчен çырнине асăрханах ĕнтĕ.

Çак кунсенче, акă, Çĕньял Хапăсри Раиса Геннадьевна Гордеева СВО задачисене пурнăçлакансене парса яма редакцире пысăк пакет хăварчĕ. Унта - паха çăмран çыхнă вунă мăшăр нуски. «Салтаксем хăтлă условисенче пурăнмаççĕ, буржуйкăсемпе ăшăнаççĕ. Урасем вара шăннине юратмаççĕ», - терĕ Раиса Геннадьевна.

Унăн çемйинчен никам та мобилизациленмен. Анчах та Раççей Хĕçпăшаллă Вăйĕсен йышне паллакансен ывăлĕсене илнисем пур. Вĕсем - унăн вĕренекенĕсем. Раиса Геннадьевна нумай çул Санарпуçĕнчи вăтам шкулта вăй хунă. Халĕ тивĕçлĕ канура. «Тивĕçлĕ канура вăхăт нумай. Çавăнпа та çуралнă тăрăх ăшшине çыхнă нускисем урлă çитерес терĕм», - пĕлтерчĕ Раиса Гордеева.

Анаткас Хапăсри Роман Арбузов, акă, салтаксем валли пĕрер михĕ кишĕрпе ыхра панă.

Вăрнарти Гагарин урамĕнчи «Пятерочка» лавккара мобилизациленнисене пулăшу кÿме ятарлă пункт уçнă.

Светлана ЧИКМЯКОВА.