«Август» Фирмăн «Вăрнарти хутăш препаратсен завочĕ» филиалĕ çитес аграри сезонĕ умĕн ÿсентăрансене хими мелĕпе хÿтĕлекен препаратсен запасне хатĕрлессипе хăватлă ĕçлет. Производство процесĕ пирки эпир завод директорне, Чăваш Республикин промышленноçĕн тава тивĕçлĕ ĕçченне, Чăваш ен Патшалăх Канашĕн депутатне Владимир Васильевич СВЕШНИКОВА каласа кăтартма ыйтрăмăр.

- Владимир Васильевич, 2022 çул çĕршывшăн йывăр пулчĕ. Вăрнарти хутăш препаратсен завочĕ мĕнле кăтартусемпе вĕçлерĕ-ха ăна/

- Завод иртнĕ çула лайăх кăтартусемпе вĕçлерĕ. Пĕтĕмпе 15,1 пин тонна ÿсентăрана хими мелĕпе хÿтĕлекен препарат туса кăларнă. 2021 çулхинчен пачах та чакман.

Предприятин производство линийĕсенчен ытларахăшĕ çумкурăкпа кĕрешекен им-çам кăларать. Пĕлтĕр ку продукци завод кăларнă препаратсен пĕтĕмĕшле калăпăшĕн 74 проценчĕпе танлашнă.

Хальхи вăхăтра ассортиментра 61 гербицид тĕсĕ. Вĕсен пысăк пайĕ - ял хуçалăхĕнче усă курмалли.

Завод çавăн пекех индустри тĕллевĕллĕ гербицидсем те кăларать. Вĕсем чукун çул магистралĕсем çинче, хĕрринче ÿсекен йывăç-тĕмсене, çумкурăка пĕтерме пулăшаççĕ.

Çавăн пекех пирĕн препаратсемпе сиенлĕ ÿсентăрана - Сосновски пултранне ?борщевика% - кĕрешме усă кураççĕ.

2022 çулта предприяти çĕнĕ тата тепĕр 8 гербицид производствине йĕркелесе ячĕ. Вĕсен рецептурисене, ВЗСП-н ытти препарачĕсенни пекех, «Август» компанин ĕçченĕсем шутласа хатĕрленĕ.

- Гербицидсемсĕр пуçне завод ытти препаратсем те кăларать. Вĕсем тĕлĕшпе ĕç-хĕл мĕнле/

- Предприятире çавăн пекех инсектицидсем те чылай кăлараççĕ. Вĕсемпе усă курса çĕр ĕçченĕсем ял хуçалăх культурисене сиенлекен хурт-кăпшанкăсемпе кĕрешеççĕ. Вăл шутра - Колорадо нăррине, пыйтăсене ?тля%, трипсăсене, упа лĕпĕшĕсене ?медведки% тата ÿсентăраншăн хăрушă ытти вĕтĕ хуртсене пĕтерекен препаратсем.

Пĕлтĕр инсектицидсене пĕтĕмпе 1,1 пин тона туса кăларнă. Ассортимент речĕ тата икĕ çĕнĕ препаратпа пуянланчĕ. Пĕтĕмпе вара завод ку продукцин 28 тĕсне реализацилет.

Фунгицидсене те 1 пин тонна ытларах туса кăларнă. Вĕсем ял хуçалăх культурисене чиртен сыхлаççĕ. Иртнĕ çул ку продукцинне те çĕнĕ тĕсĕсене ĕçе кĕртнĕ - тăватă çĕнĕ препарата серипе кăларма пуçланă. Пĕтĕмпе вара завод производствинче 17 тĕслĕ фунгицид. Вĕсем фитофтороз, кĕсен ?парша%, мучнистая роса тата ытти чирсенчен пулăшаççĕ.

2022 çулта заводра ял хуçалăх культурисен вăрлăхĕ валли протравительсем, унсăр пуçне адъювантсем тата йăлари хими хатĕрĕсем кăларассипе те тимлерĕç.

- Кĕçех ака ĕçĕсем тытăнаççĕ. Ку вăхăтра, ахăртнех, завод та продукци туса кăларассипе хăвăртлăха ÿстерет/

- Чăнах та, хальхи вăхăтра Вăрнарти хутăш препаратсен заводĕнче çитес ял хуçалăх сезонĕ валли продукци кăларассипе тăрăшаççĕ. Мĕнпур цехсем кунĕн-çĕрĕн ĕçлеççĕ. Вăл шутра - шăматкунсенче те. Полимерлă тарăсем кăларакан цех вара пĕр кун та чарăнмасăр, татти-сыпписĕр ĕçлет. Хатĕр продукцин фасовки валли савăтсем çителĕклĕ хатĕрлессипе тимлет.

Предприятин производствăна чарăнмасăр ĕçлеттерме чĕртавар çителĕклĕ. Январьте кăна чукун çулпа завода тĕрлĕ компонентлă, кашни 20 тонна таякан 74 контейнер килсе çитнĕ.

2023 çула завод лайăх кăтартусемпе пуçларĕ. Пĕр уйăхра аграри предприятийĕсем валли пысăк фасовкăсемпе 1,5 тонна хими препарачĕ кăларнă. Пĕлтĕрхи ку тапхăртинчен 5: ытларах.

ЛПХ валли препаратсем кăларакан цех вара иртнĕ çулхи ку вăхăтри кăтартăва 19: ирттерсе пурнăçланă. Чĕртавар пур - ĕç пур. Предприяти тăнăçлă ĕçлесе пырать.

- Калаçушăн тав.