Мĕнпе пурăнаççĕ паянхи çамрăксем/ Мĕнпе кăсăкланаççĕ, мĕнле пулăшу кĕтеççĕ аслисенчен/ Вĕсене активлă гражданла позициллĕ граждансем, чăн-чăн патриотсем пулма мĕнле çул кăтартмалла/

Çак ыйтусене сÿтсе явма вĕрентÿ пайĕ округри чи активлă та пуçаруллă шкул ачисене, хĕрсемпе каччăсене калаçăва чĕнчĕ. Тĕп библиотекăра «çавра сĕтел» тавра йĕркеленĕ тĕлпулу уçă та ăшă лару-тăрура иртрĕ. Мероприятие савăнăçлă самантпа уçни те пурин кăмăлне çĕклерĕ, паллах. Вăрнар округĕн пуçлăхĕн заместителĕ - вĕрентÿ пайĕн пуçлăхĕ Алексей Фирсов творчествăлла ăнтăлушăн Чăваш ен Пуçлăхĕн ятран стипендине тивĕçнисене свидетельствăсем пачĕ, хастарлăха малашне те аталантарсах пыма сунчĕ. Унпа пĕрлех калаçăва округ пуçлăхĕн çамрăксен ĕçĕсемпе тимлекен советникĕ Сергей Ермошкин та хутшăнчĕ.

Пирĕн тăрăхра 14 çултан 35 çулчченхи 7516 çамрăк çын, пĕтĕм халăхăн - 24,5 проценчĕ. Вĕсем - хăйсен интересĕсемпе, шухăш-кăмăлĕпе пурăнакан ушкăн. Çавăнпа та вĕсене пĕлĕвĕпе пултарулăхне тата тавракурăмне аталантарма, тĕрĕс воспитани илме пулăшакан чылай ĕç пурнăçа кĕрет. Çакăн пирки, пĕлтĕрхи мероприятисене пĕтĕмлетсе, Алексей Фирсов тĕплĕн пĕлтерчĕ.

Округра, сăмахран, çамрăксен регистрацилемен çичĕ пĕрлешĕвĕ ĕçлет. Вĕсем республика шайĕнчи форумсене хутшăнса хăйсене маттур кăтартаççĕ. Вăрнарти хутăш препаратсен заводĕнчи Канаш республикăра та чи лайăххисен шутĕнче. Çавăнпа та пĕрлешÿ ертÿçи Эдуард Гаврилов предприятире активлă çамрăксене пĕр тĕвве пухас, йышпа пĕлтерĕшлĕ ĕçсене пурнăçлас опытпа паллаштарни пуриншĕн вĕрентÿллĕ пулчĕ. Вăл республикăри чылай форум-канашлăва хутшăннă май тухăçлă сĕнÿ пачĕ: округра малтанах чи пуçаруллă, ыттисене хăйсем хыççăн туртакан çамрăксене пĕрлештерекен тытăм туса хумалла. Унта кĕрекенсен вара тĕрлĕ ÿсĕмри, тĕрлĕрен учрежденире вĕренекен е ĕçлекен яшсене ырă та усăллă ĕçсене явăçтармалла.

Алексей Фирсов пĕлтернĕ тăрăх, пирĕн тăрăхри çамрăксем пуринчен ытла хастарлăх кăтартакан ен - волонтерлăх. Хальхи вăхăтра округра доброволецсен 34 отрячĕ шутланать. Волонтерсене «Добро.ру» порталта регистрацилесси пырать, паянхи куна сайтра - 1105 çын. Регистрациленнĕ командăсенчен иккĕшĕ Вăрнарти ял хуçалăх техникумĕнче. Волонтер юхăмне кĕнĕ студентсем - вĕрентÿ организацийĕсем тата муниципалитет ирттерекен пĕлтерĕшлĕ мероприятисен участникĕсем.

Кăçал çамрăксен политики енĕпе округ ертÿлĕхĕ татах та тĕллевлĕрех тимлеме палăртнине çирĕплетрĕ Алексей Николаевич. Чи малтанах талантлă та пултаруллă яшсемпе хĕрсене пулăшма майсем шырамалла, пуçаруллă шухăш-кăмăла çул памалла. Çавăн пекех тĕп задачăсен шутĕнче - сывă пурнăç йĕркине пропагандăласси тата гражданла-патриотла хаклăхсене сарасси те.

«Çавра сĕтеле» хутшăннă çамрăксем те малашлăх ĕçе хăйсем мĕнле курнипе уççăн паллаштарчĕç. Вĕсен шухăшĕпе, конкурссене хутшăнса грантсем çĕнсе илни пĕлтерĕшлĕ. Финанс пулăшăвне тивĕçни хамăр тăрăхшăн кирлĕ социаллă тата ытти проектсене пурнăçа кĕртме май парать. Анчах проектсене хатĕрлессипе хăнăхусем сахалрах, вĕренÿсем йĕркелесен аван, терĕç вĕсем. Унсăр пуçне, ытти районсенчи тантăшĕсен паха опычĕпе паллашас кăмăл пур. Пĕрлехи тĕлпулусем йĕркелесен те пысăк усă пулнине палăртрĕç.

«Пирĕн округра çамрăксемшĕн интереслĕ мероприятисем ытларах иртчĕр, савăнăçлă кану валли те майсем пулччăр. Çак тĕллевпе пĕрле тăрăшмалла», - çирĕплетрĕç пуçаруллă хĕрсемпе каччăсем.

Ирина ЯКОВЛЕВА.