Социаллă ĕçченсем пархатарлă професси суйласа илнĕ. Çынсемшĕн тăрăшасси - вĕсен тĕп тивĕçĕ.

Социаллă хÿтлĕх сферинче тимлекенсен яваплăхĕ калама çук пысăк. Вĕсем хевтесĕр çынсемпе ветерансене те, нумай ачаллă çемьесене те пулăшу кÿреççĕ. Пĕччен пурăнакан çынсемпе чунне уçса калаçаççĕ. Утмăл çултан аслăрах кашни иккĕмĕш çынна патронаж мелĕпе асăрхаса тăраççĕ.

Людмила Валерьевна Николаева ырă ят-сумра. Социаллă сферăра 1997 çулта тăрăшма пуçланă. Хастар ĕçчене ветерансен çурчĕн заведующийĕн пуканне шанса панă. Вăл ертсе пынипе учреждени икĕ хутчен - 2002 тата 2003 çулсенче - республикăри смотрта иккĕмĕш вырăн йышăннă.

Людмила Валерьевна 2006-2019 çулсенче халăха социаллă хÿтлĕхпе тивĕçтерессипе тимлекен центрăн пуçлăхĕнче вăй хунă. Нумай çул тÿрĕ кăмăлпа ĕçленĕшĕн темиçе хутчен те Раççей Федерацийĕн тата Чăваш Республикин ведомствисен Хисеп грамотисене тивĕçнĕ.

Людмила Валерьевна 2019 çулта тивĕçлĕ канăва тухнă пулсан та пархатарлă тивĕçе пурнăçлама пăрахман, халĕ вăл - хевтесĕр çынсене пăхакан. Людмила Николаеван авторитечĕ пысăк. Вăл - хастарлăхпа палăрса тăракан кĕмĕл волонтерсенчен пĕри. Питĕ тимлĕ, ырă чунлă специалист. Çынсен хуйхи-суйхине чĕри патне илет.

Маттур хĕрарăм 2020 çултанпа - Пĕтĕм Раççейри инвалидсен обществин вырăнти организацийĕн председателĕ.

Елена ТОЛСТОВА