Ачасене хăйсен чунри туртăмĕсене, тĕрлĕ енлĕ пултарулăхне аталан-тарма майсем туса пани питĕ аван. Пĕтĕм Раççейри «Включайся!» фестиваль те, акă, çамрăксене медиасфера «тĕнчине» илсе кĕрет, вĕсен тавракурăмне пуянлатать, пултарулăхри ĕмĕт-тĕллевĕсене пурнăçа кĕртме пулăшать.

Ача-пăча медиаушкăнĕсене пĕрлештерекен ку фестиваль кăçал 18-мĕш хут иртнĕ ĕнтĕ. Палăртмасăр май çук, çак пысăк тапхăрта вăл çамрăк тусĕсен юратăвне те, авторитетлă профессионалсен хисепне те çĕнсе илнĕ. Хальхинче те медиауяв çĕршывăн тĕрлĕ кĕтесĕнчи 800 енне арçын ачапа хĕрачана пĕр шухăшпа, пĕр вырăнта - Мускаври «Останкино» киноконцерт залĕнче - пухнă.

Çак йышра Чăваш енĕн çамрăк телевидени ăстисем те пур. Республикăра паллă «Куча-мала» ушкăнăн та фестиваль пурнăçне туллин явăçма, çак асамлă атмосферăна туйма май пулнă. Медиаĕçри çĕнĕлĕхсем, пĕл-терĕшлĕ вăрттăнлăхсем, тĕрлĕ регионти тантăшĕсемпе хутшăнни... - çак виçĕ кун ачасемшĕн пĕр самант пекех иртсе кайнă.

Курмалли-вĕренмелли вара чăнах та чылай пулнă. Телевидени профессионалĕсем ку ĕçре малтанхи утăмсене тăвакан çамрăк тусĕсене тĕрлĕрен мастер-классенче хăйсен опычĕпе паллаштарнă: ăнăçлă проектсем йĕркелессипе, интереслĕ видеороликсем ÿкерессипе, монтаж вăрттăнлăхĕсем тĕлĕшпе... Тата çăлтăрлă хăнасемпе - паллă актерсемпе, режиссерсемпе, журналистсемпе - тĕл пулса калаçни те мĕне тăрать!

Чăваш енри «Куча-мала» медиакоманда хастарĕсем, акă, Пĕрремĕш канал, «Пятница», Disney валли хатĕрлекен проектсен режиссерĕ, продюсерĕ Александр Дибривный монтаж мелĕсене вĕрентни питĕ усăллă пулнине палăртаççĕ. Унсăр пуçне «Модный приговор» тата «Лучше всех» проектсен стилисчĕн Евгения Артемьеван мастер-класĕнчи сĕнÿсем те ведущисене кадрта илемлĕ курăнма пулăшĕç.

Телĕнмелле те, кĕске вăхăтрах, ансат япаласемпех стилистсем кашни çыннăн сăн-сăпатне улăштарма пултараççĕ иккен. Ачасен, чăн та, медиауяв парнеленĕ ырă туйăмсен вĕçĕ-хĕрри те çук.

Çавăн пекех палăртмалла, фестивале Раççейри 148 хуларан 326 студи 587 ĕç тăратнă. Вĕсене тĕрлĕрен номинацисенче тишкернĕ. «Куча-мала» ушкăнăн ĕçне те профессионаллă жюри пысăк хак панă.

Ирина ЯКОВЛЕВА