Пирĕн округри аграрисем сортлă ял хуçалăх культурисене акассипе аван ĕçлесе пыраççĕ. «Сорт ĕçе ăнăçтарать», - тесе ахальтен каламан вырăссен паллă селекционерĕ И.В.Мичурин.

Акă, кăçал та çĕр ĕçченĕсем çуракинче маттур пулчĕç, сортлă тата кондициллĕ вăрлăха 13 пин ытла гектар çинче акса хăварчĕç, вĕсенчен 25 проценчĕ элитăллă тата супер-элитăллă культурăсем. Ку кăтартупа эпир республикăри ытти округсемпе танлаштарсан малти ретре пыратпăр.

Çĕрулми лартассипе «Мураты», «Янгорчино» кооперативсем, «Агрохмель» агрофирма тата В.Павлов фермер хуçалăхĕ тăрăшуллă ĕçлесе пыраççĕ. Вăрлăхсене çĕнетсех тăраççĕ. Акă, кăçал «Янгорчино» ЯХПК «Прайм» тата «Калина», «Мураты» ЯХПК «Кингсмен», «Гала», «Агрохмель» - «Винета», «Ред Скарлет» элита вăрлăхсем туянса лартрĕç. В.Павлов фермер та «иккĕмĕш çăкăрăн» сортне çĕнетнĕ. Унăн хуçалăхĕнче «Ай оф Джура» çĕрулми çитĕнет.

Каласа хăвармалла, патшалăх пулăшăвне илес тесен сортлă тата кондициллĕ вăрлăхсемпе çеç усă курмалла.

Вячеслав АЛЕКСЕЕВ,

Раççей ял хуçалăх центрĕн Вăрнарти уйрăмĕн ертÿçи