Тăван чĕнет хăйĕн тăванне

Пĕрле палăртма Акатуй кунне...

Тĕлĕнмелле хитре шăрантарчĕç çĕрпелсем уяв кунне Акатуй юррине. Вĕсем хăнасене хăйсем патне чĕнчĕç кăна мар, чăвашсем мĕн авалтан туслă пулнине, пĕрле савăнма пĕлнине кăтартса пачĕç.

Тĕрĕссипе, юбилейлă Акатуй кунĕнче ?кăçал вăл 90-мĕш хут иртрĕ!% ялсенчи территори пайĕсем пурте мĕнпе те пулин тĕлĕнтерме тăрăшрĕç. Вĕсен сĕтелĕсем чăваш апат-çимĕçĕпе тулăх пулчĕç. Хăйсен хăна çуртне нумайăшĕ кăçалхи Педагогпа наставник тата Телейлĕ Ачалăх çулталăкне халалланă. Хăш-хăш палаткăсенче совет тапхăрĕ «хуçаланчĕ», кунта пионер юррисем, горн янăрарĕ. Хăнасем те кăсăкланчĕç. Акă, Чăваш енри çын прависемпе тимлекен уполномоченнăй Сергей Романов, «Единая Россия» партин вырăнти уйрăмĕн секретарĕ Владимир Яковлев горнпа кĕвĕ те кăларса пăхрĕç.

Ял ĕçченĕсен палаткисем умĕнчен ахаль иртеймĕн. Вĕсенче илемлĕ картинăсем, чăваш тĕррисем вырнаçтарнă. Уйкас-кипексен, ак, чăн-чăн сăмавар вĕресе ларать, кунтах пулли ишет, йытă çурийĕ йăвара выртать. Калининăсем юмах тĕнчине йыхравларĕç, вĕсем «Приключения Буратино» сăнарĕсемпе хăйсем тавра илĕртрĕç.

Вăрнар тăрăхĕнче тата мĕн чухлĕ алăсти/! Санарпуçсем хăйсем çĕленĕ пуканисене илсе тухнă. Малтикас Ялтăра тăрăхĕнчи Алексей Павлов хăйĕн картинисене курма йыхравларĕ. Ÿнер шкулĕн, ача-пăча пултарулăх çурчĕн ĕçченĕсем, ытти маçтăрсем мастер-классем йĕркелерĕç. Акатуй юрри аякка юхрĕ.

Уявăн официаллă пайĕ вăйă картинчен пуçланчĕ. Культура ĕçченĕсем карталанса ташланă хыççăн хăнасене çăкăр-тăвар астивме сĕнчĕç. Вăрнарсене çĕр ĕçĕсем вĕçленнĕ ятпа саламлама, çÿлерех асăнтăм ĕнтĕ, Сергей Романов, Владимир Яковлев, Вăрнар округĕн пуçлăхĕ Андрей Тихонов, патшалăх служащийĕсен республикăри профсоюз организацийĕн председателĕ Василий Харитонов, Чăвашпотребсоюз правленийĕн представителĕ Ирина Яшмулкина килсе çитрĕç. Каярах ентешсене Раççей Патшалăх Думин депутачĕ Леонид Черкесов, Чăваш Патшалăх Канашĕн депутачĕ Владимир Свешников, «Порт Коломна» АО-н гендиректорĕ Владимир Алексеев та саламланă.

Кăçал та харпăр хăй ĕçĕнче палăрнă вун-вун çын тĕрлĕ ведомствăсен наградисене тивĕçрĕ.

Чăваш ен Ял хуçалăх министерствин Хисеп грамотине «Вăрнарти аш-какай комбиначĕ» АО-н выльăх-чĕрлĕх комплексĕн скотникĕ Людмила Васильева, сысна комплексĕн мельникĕ Аниса Николаева, тракторист-машинисчĕ Алексей Тинюков, К.Маркс ячĕллĕ хуçалăх тракторисчĕ Иван Григорьев, «Вăрнарти аш-какай комбиначĕ» ТМЯО-н аш-какай обвальщикĕ Анатолий Егоров, кăлпасси цехĕн аппаратчикĕ Надежда Максимова, холодильник цехĕн грузчикĕ Надежда Семенова, «Агрохмель» агрофирма тракторисчĕ Александр Фадеев тата «Мураты» хуçалăх механизаторĕ Борис Федоров тивĕçрĕç. Тавĕпе «Санары» агрофирмăн экономистне Татьяна Муравьевана чысларĕç.

Хирпуçĕнчи культура çурчĕн ертÿçи Алина Илларионова тата Калининăри Культура çурчĕн художество ертÿçи Елена Мышкина Чăваш Республикин Культура, национальноçсен ĕçĕсен тата архив ĕçĕн министерствин Тавне илчĕç.

Чăваш ен Патшалăх Канашĕн Хисеп грамотине тивĕçнисем: Вăрнарти аш-какай комбиначĕн ĕçченĕсем - кăлпасси цехĕн автомат операторĕ Елена Магушова тата сысна комплексĕн операторĕ Людмила Порфирьева. Тавĕпе агрохолдингăн кăлпасси цехĕн автоматизаци линийĕн операторне Надежда Петрована наградăларĕç.

Çĕр ĕçĕн пысăк культуришĕн тата прогрессивлă технологисене пурнăçа кĕртсе пынишĕн 1 степеньлĕ диплома «Санары» агрофирма тата Вера Дмитриеван фермер хуçалăхĕ, 2-мĕш степеньлине К.Маркс ячĕллĕ тата Валентин Павловăн фермер хуçалăхĕсем, 3-мĕш степеньлине «Мураты» тата Денис Авакумовăн фермер хуçалăхĕсем тивĕçрĕç.

Вăрнар округĕн Хисеп грамотине илнисем: «Знамя» хуçалăх слесарĕ Владимир Александров, Упнер территори пайĕн тĕп специалист-эксперчĕ Надежда Змеева, «Санары» агрофирмăн склад заведующийĕ Ирина Иванова, округ администрацийĕн ял хуçалăх пайĕн тĕп специалист-эксперчĕ Людмила Капитонова, çул-йĕр тата ЖКХ секторĕн ертÿçи Артур Марков, Хапăсри ветеринари участокĕн ветфельдшерĕ Алина Краснова, К.Маркс ячĕллĕ хуçалăхăн ферма заведующийĕ Надежда Мефодьева. Тавĕпе 22 çынна чысларĕç.

Патшалăх служащийĕсен тата обществăлла тивĕçтерÿ ĕçченĕсен профсоюзĕн республикăри организацийĕн Президиумĕн Хисеп грамотине Кĕçĕн Кипек территори пайĕн пуçлăхĕ Сергей Волков, округ администрацийĕн ĕçченĕсем Татьяна Михайлова тата Светлана Егорова илчĕç.

«Единая Россия» партин регионти уйрăмĕн Тавне илме сцена çине парти хастарĕсем Ирина Алексеева, Елена Голубцова, Татьяна Михайлова, Елена Мышкина, Венера Прокопьева хăпарчĕç.

«Норусово» ТМЯО кондитерĕ Галина Ильина тата Калинино райповĕн водителĕ Алексей Скворцов Чăвашпотребсоюз Канашĕн Хисеп грамотиллĕ пулчĕç.

Акатуйра спорт вăййисем те анлăн иртрĕç. Ирĕклĕ кĕрешÿре уявăн тĕп парнине - такана - Никита Львов выляса илчĕ.

Концерт программи çав тери пуян пулчĕ. Обществăлла апатлану ĕçченĕсем пурне те тутлă шÿрпепе, шашлăкпа, ытти çимĕçпе сăйларĕç.

Светлана ЧИКМЯКОВА