Уяр çанталăк тăрать. Хĕл каçмалăх выльăх апачĕ хатĕрлеме шăпах меллĕ. Ял хуçалăх организацийĕсен уй-хирĕсем иртен пуçласа каçченех техника кĕрлевĕпе тулаççĕ. Ĕçченсем утă, сĕтеклĕ апат хатĕрлессипе вăй хураççĕ.

Нумай çул ÿсекен курăксен лаптăкĕсенче хурçă утсем самантлăха та чарăнмаççĕ тейĕн. Ара хресчен уяр çанталăкăн кашни саманчĕпе туллин усă курма тăрăшать. Сар хĕвелĕ тÿперен пăхса йăл кулнă чух симĕс ĕççи те вăй илсех пырать.

Çĕртме уйăхĕн 16-мĕшĕ тĕлне нумай çул ÿсекен курăксене округра икĕ пин гектара яхăн çулнă. Хастар тăрăшакан предприятисенчен пĕри - «Вăрнарти аш-какай комбиначĕ» АО. Кунта çулсеренех выльăх апачĕ ытлă-çитлĕ хатĕрлеççĕ. Агрохолдингăн Малтикас Ялтăрари выльăх-чĕрлĕх комплексĕн ĕçĕ-хĕлĕпе çак эрнере округ администрацийĕн ял хуçалăхĕпе экологи пайĕн тĕп специалисчĕ Людмила Капитонова, ветстанци пуçлăхĕ Владимир Матвеев паллашрĕç.

- Хĕл хырăмĕ пысăк. Выльăх апачĕ çителĕклĕ хатĕрлесен аш-пăш, сĕт туса илесси те ÿсĕ, - терĕ Людмила Капитонова.

Аш-какай комбиначĕн сенаж траншейисем сĕтеклĕ апатпа тулса пыраççĕ. Вĕсем тÿпенелле тăсăлакан сăрт-тăва асилтереççĕ.

- Эрне вĕçлениччен пĕтĕмпе 7500 тонна сенаж хывмалла, - пĕлтерчĕ Малтикас Ялтăрари выльăх-чĕрлĕх комплексĕн директорĕ Валентина Тимофеева. Сĕтеклĕ апата хатĕрлеме предприятире вунă кун уйăраççĕ. Палăртнă тĕллевсене яланах пурнăçлама тăрăшаççĕ.

Ĕç юхăмне тĕрĕс йĕркеленĕрен симĕс масса уй-хиртен конвейер пек килсе тăрать. Акă, Владимир Самсонов механизатор, сенажа техникăпа хытараканскер, ĕç кал-кал пынипе кăмăллă. Аш-какай комбиначĕн хушма хуçалăхĕн хастарĕсем чăннипех маттур. Хăйсен тивĕçне чыслăн пурнăçлаççĕ. Çуллан малтанхи кунĕнчен тытăнса кĕркуннечченех выльăх апачĕ хатĕрлеççĕ.

Комплексра хĕле хатĕрленес ĕç те пырать. Ĕне выльăха лайăх условисенче тытас тесе тăрăшаççĕ. Фермăри витесене кашни çулах дезинфекци туса тата шуратса тухаççĕ. Пĕлтерĕшлĕ ĕçе пурнăçлама ветстанцире тимлекенсем пулăшаççĕ.

Комбинатăн Малтикас Ялтăрари комплексĕнче çак тапхăр тĕлне мăйракаллă шултра выльăх-чĕрлĕх - 4807 пуç, çав шутра 2090-шĕ - ĕне. «Хушка пуçсенчен» кулленех 32 тонна сĕт суса илеççĕ: 29 тоннине патшалăха сутаççĕ, ыттине пăрусене тăрантарма уйăраççĕ. Палăртмалла, Вăрнар округĕпе сĕт суса илнин 63 проценчĕ - предприятин тÿпи.

Ăратлăха лайăхлатас ыйту тĕпре тăрать. Ĕнесене искусствăлла майпа пĕтĕлентерес ĕçре çĕнĕлĕхсемпе анлăн усă кураççĕ. Надежда Якимова учетчик палăртнă тăрăх, кашни уйăхра 200 пуçа яхăн пăру кун çути курать.

Комплекс ĕçченĕсем хастар. Акă, Елена Кириллова хăйĕн профессийĕнче чăн ăста. Вăл ĕнесене машинăпа сăвакан хĕрарăм-операторсен республикăри конкурсĕнче çĕнтернĕ.

Тĕплĕнрех çитес номерте.

Елена ПОРФИРЬЕВА