Округри аталану çулĕпе пыракан хуçалăхсем обществăлла выльăх-чĕрлĕхе йĕркеллĕ условисенче тытаççĕ, чĕрчунсен сывлăхĕшĕн тăрăшаççĕ, селекци ĕçне анлă çул параççĕ. Çавна май выльăх-чĕрлĕх продукцин производствине ÿстерме майсем те çителĕклĕ.

Кăçалхи сакăр уйăхра мĕнпур тытăмри хуçалăхсенче 3893,37 тонна аш-пăш туса илнĕ, ĕç планне 114,2 процент пурнăçланă. Пуринчен ытла ял хуçалăх предприятийĕсем ÿсĕмлĕ ĕçленĕ, сакăр уйăхри кăтарту - 3397,27 тонна. Иртнĕ çулхи çак тапхăртинчен аш-пăша 20,8 процент ытларах туса илнĕ.

Сĕт производствинче те ÿсĕм пур. Çак тапхăрта 27427,6 тонна сĕт туса илнĕ, ĕç планне 103,2 процент тултарнă. Ял хуçалăх предприятийĕсен кăтартăвĕ 13376 тонна ?102,7:%, кил хуçалăхĕсен - 12799 ?104,8:%. Ăратлăх ĕçĕнче тĕллевлĕ программăсемпе усă курнипе, сĕт-çу ферминче тăрăшакансем яваплăха туйса тимленипе ĕç кăтартăвĕсем лайăхланнă.

Ял хуçалăх организацийĕсенче кашни ĕнерен вăтамран кунне 16,7 кг сĕт суса илеççĕ, хресчен хуçалăхĕсенче - 13,9 кг. Хăшпĕр хуçалăхсенче кăтарту тата пысăкрах. Авăн уйăхĕн 13-мĕшĕнчи даннăйсем тăрăх, пĕрремĕш вырăнта - Карл Маркс ячĕллĕ кооператив. Хуçалăхра кашни ĕне пуçне 23,5 кг сĕт суса илеççĕ. «Броневик» ЯХПК-ри сĕт-çу фермин кăтартăвĕсем те ÿсĕмлĕ. Вăтам сăвăм 21 килогрампа танлашнă. Ытти хуçалăхра çакăн пек кăтартусем: «Янгорчино» хуçалăхра - 18,8, «Мураты» кооперативра - 17, «Победăра» - 16,3, аш-какай комбиначĕн хушма хуçалăхĕнче - 15,3, «Кольцовка» агрофирмăра - 14,3.

Округĕпе илсен, сакăр уйăхра кашни ĕнерен вăтамран 3865 кг ?102,7:% сĕт суса илнĕ.

Пĕтĕмĕшле илсен, мăйракаллă шултра выльăх-чĕрлĕх йышĕ - 15619 пуç, ял хуçалăх предприятийĕсенче - 8768, кил хуçалăхĕсенче - 6147, хресчен фермер хуçалăхĕсенче - 704.

Çак вăхăт тĕлне мĕнпур тытăмри хуçалăхсенче 7581 пуç ?101,1:% ĕне усраççĕ. Ялсенче пурăнакансем сăвакан ĕнесен йышне пысăклатма тăрăшни савăнтарать. Кăçалхи сакăр уйăхри кăтарту - 3793, пĕлтĕрхи çак тапхăрта хушка пуçсене 3633 тытни паллă.

Лашасем мĕнпур харпăрлăхри хуçалăхсенче - 86 пуç, 65-шĕ кил хуçалăхĕсенче. Качакасемпе сурăхсене те ĕрчетеççĕ, 4041 ытла пуç усраççĕ.

Пысăк организацисенчен пĕринче - Вăрнарти аш-какай комбиначĕн хушма хуçалăхĕнче - мăйракаллă шултра выльăх-чĕрлĕх шучĕ 4976 пуç, çав шутра ĕнесем 2090. Предприяти сысна ĕрчетессипе те тĕллевлĕ ĕçлет.

Тăрăшуллă, ял хуçалăх ĕçне чун-чĕререн парăннă çынсем - агропромышленность комплексĕн тĕрекĕ, мăнаçĕ. Акă, тĕслĕхрен, аш-какай комбинатĕнчи Антонина Анатольевна Кондратьева бухгалтер, Елизавета Александровна Егорова зоотехник - ырă ят-сума тивĕçнĕ специалистсем. Иккĕшĕ те пуян опытлă, ăста квалификациллĕ ĕçченсем.

Отиккăвăра та маттурсем пур. Еленăпа Алексей Фадеевсем чылай çул хресчен-фермер хуçалăхне аталантарассипе вăй хураççĕ. Ÿсĕм-çитĕнĕвĕ те куç умĕнчех. Мăйракаллă шултра выльăх-чĕрлĕх 230 пуç тытаççĕ, иртнĕ çулхи çак тапхăртинчен 24 пуç ытларах.

Юнтапа тăрăхĕнчи Александр Быков хастарлăхне те палăртмалла. Фермер хуçалăхне аталантарассипе вăл иккĕмĕш çул кăна ĕçлет пулин те выльăх-чĕрлĕх йышне 5 пуçран 27-е çитернĕ. Ун плансем те пысăк.

Людмила КАПИТОНОВА,

ял хуçалăхĕпе экологи пайĕн ертсе пыракан специалисчĕ