Паттăрсен астăвăмне упрани, вĕсен мухтавлă ĕçĕсене чыслани хаклă. Çамрăк ăру та вĕсене пĕлтĕр, камран тĕслĕх илмеллине яланах асра тыттăр. Çак сумлă тĕллеве пурнăçлаççĕ те ĕнтĕ вĕренÿ учрежденийĕсенчи Герой парттисем.

Округра тепĕр астăвăм палли, акă, ытларикун Ярмушкари шкулта уçăлнă - чăн-чăн паттăр, шкул мухтавĕ, ун выпускникĕ Николай Артемьев ячĕпе. Вăл - ятарлă çар операцийĕнче çĕршыв интересĕсене хÿтĕлесе хăюлăхпа çирĕплĕх кăтартнă çыр çыннисенчен пĕри.

Николай Артемьев - Кушар Юнтапа каччи. Малтанах Уйкас Юнтапа ялĕнче вĕреннĕ, 2007-2016 çулсенче вара Ярмушкари вăтам шкулта пĕлÿ пухнă. Вĕренÿре те, обществăлла ĕçре те, спортра та хастарлăхпа палăрнине аса илеççĕ ун пирки. Каярахпа вара çамрăк Шупашкарти машиностроительнăй техникумра электрогазосварщик тата сантехник специальноçĕсене алла илнĕ те ку енĕпе вăй хунă.

2019 çулхи ноябрьте Николайăн çар ретне тăма вăхăт çитет. Ăс-тăнĕпе те, ÿт-кĕлеткипе те çирĕп, маттур каччăна чи сумлă çар тĕсĕсенчен пĕрне - Сывлăш-десант çарĕсене - илеççĕ. Вăл Омскри хатĕрленÿ вăхăтĕнче те, Псковри служба тапхăрĕнче те яланах чи тĕслĕхлисен шутĕнче пулнă.

Николайăн мăшăрĕпе пĕчĕк ывăлĕ пур. 2022 çулта пĕрлешнĕскер вăл «çемье вучахне» йĕркелесе килĕшÿллĕ пурăнас тĕллевпе хавхаланнă. Анчах шутлани-ĕмĕтленни пĕр самантра татăлнă-çке... Çав çулах, октябрьте, мобилизаци йĕркипе çар службине чĕнсе илсен Кушар Юнтапа çамрăкĕ ятарлă çар операцине тухса кайнă. Çакăн пирки иккĕленÿ-хирĕçлев те пулман унăн - çĕршыва, ентешĕсене хÿтĕлессине яланах сăваплă тивĕç вырăнне хунă вăл.

Фронтра мотострелоксен ротинче службăра тăнă. Çапăçу хирĕнче пĕрле çума-çумăн пулнисем вăл шанчăклă, яланах пулăшма хатĕр юлташ пулнине çирĕплетеççĕ. Хăйĕн пурнăçĕ çинчен шутламасăр вăл хĕçпăшал вут-хĕмĕ айĕнчен аманнисене кăларса хăвăртрах пулăшу пама пĕрре мар хутшăннă.

2023 çулхи апрельтен Николай çар задачисене разведкăпа шырав ушкăнĕнче пурнăçлама тытăннă. Шăпах Запорожье облаçĕнчи Вербовое çывăхĕнче çар хушăвне пурнăçланă чух ĕнтĕ, кăçалхи апрельте, пурнăçĕ çамрăклах татăлнă унăн. Паттăрла ĕçĕсене палăртса, ентешĕмĕре Раççей Президенчĕн Указĕпе Хăюлăх орденĕпе наградăлама йышăннă.

- Ярмушка шкулĕ хăйĕн мухтавлă вĕренекенĕпе чăннипех мăнаçланать. Унăн хисеплĕ ятне, паттăрлăхне нихçан манăçми упрама тĕллев тытать. Вăл - хăюлăхпа хастарлăхăн, сăваплă тивĕçе чунтан парăннин, Тăван çĕршыва виçесĕр юратнин чăн тĕслĕхĕ, - палăртнă Георгий Сорокин директор, Герой парттине уçнă май. Çак сăмахсене Вăрнар округĕн пуçлăхĕн заместителĕ Алексей Фирсов, Ярмушка территори пайĕн пуçлăхĕ Андрей Яковлев, «Вăрнар округĕн патриочĕсем» обществăлла организацин секретарĕ Елена Голубцова, Николай Артемьевпа çума-çумăн службăра тăнисем те çирĕплетнĕ.

«Хирĕçтăру пыракан вырăна Николайпа пĕрле тухса кайнă эпир. Служба йывăрлăхĕсене те пĕрле пайланă. Пĕр ÿстермесĕр, тăван çĕре юратакан, тивĕçе чыслăн пурнăçлакан çамрăкчĕ», - хурланса пĕлтернĕ Евгений Лукин, хальхи вăхăтра тăван яла кĕске отпуска килнĕскер.

Николай Владимирович Артемьева халалланă парттăна уçма унăн амăшĕпе мăшăрĕ тивĕçнĕ.

Унăн тĕслĕхĕ - паттăрсем Тăван çĕршывăн хăрушсăрлăхĕшĕн епле пысăк хак тÿленин кăтартăвĕ. Вĕсен кашнин ячĕ вĕçĕм астăвăмра, хисепре пулмалла.

Ирина ЯКОВЛЕВА