Хаçат ĕçченĕсем паян чи мобильлĕ çынсем тесен те йăнăш пулмĕ. Вĕсем хаçат çырма та, пичетлеме те, социаллă сетьсене ертсе пыма та, тĕрлĕ мероприятисене хутшăнса вĕсене çутатма та ĕлкĕреççĕ.

Хальхинче, ак, вĕсен спорт мероприятийĕн геройĕсем пулса тăма тиврĕ. Шупашкарти «Волга» стадионта пĕрремĕш хут массăллă информаци хатĕрĕсем хушшинче ГТО фестивалĕ иртрĕ. Ăна пуçарса яраканĕсем - Чăваш енри Спорт тата Цифра министерствисем, «Советская Чувашия» хаçат.

Фестивале хутшăнакансене Чăваш Республикин Пуçлăхĕ Олег Николаев, Цифра тата Спорт министрĕсем Михаил Степановпа Василий Петров, çăмăл атлетика енĕпе СССР спорт мастерĕ, Е.Николаева ячĕллĕ 8-мĕш /-лĕ Олимп резервĕсен спорт шкулĕн директорĕ Алина Иванова ăнăçу сунчĕç. «ГТО фестивалĕ çан-çурăм çирĕплĕхне тĕрĕслени кăна мар, регионти пур медиасферăшăн та хавхалантармалли сăлтав пулса тăрать. Цифра технологийĕн ĕмĕрĕнче, компьютер умĕнче нумай вăхăт ирттернĕ чухне, сывă пурнăç йĕрки çине тимлĕх уйăрни пĕлтерĕшлĕ. Çакăн пек мероприятисем республикăри журналистсен пĕрлешĕвне хавхалантарасса тата вĕсен аудиторине харпăр-хăй сывлăхĕ çине, енчен те вĕсем çакна тума пуçламан пулсан, тимлĕрех пăхма хĕтĕртессе шанатăп», – терĕ Цифра министерствин ертÿçи Михаил Владимирович.

Фестивале хутшăнакан тĕрлĕ массăллă информаци хатĕрĕсенче тăрăшакансен шучĕ 100-тен те иртрĕ. Кашни команда - тăватшар çынран. Вăрнарсенне Светлана Чикмякова тĕп редактор, Инга Свечкина оператор, Татьяна Данилова печатник тата Руслан Волков водитель пĕрлешрĕç. Кунсăр пуçне редакци ĕçченĕсене хавхалантарма округ администрацийĕн представителĕсем хутшăнчĕç. «Çĕнтерÿ çулĕ» хаçат редакцийĕн коллективĕпе пĕрле Вăрнар округĕн пуçлăхĕ Надежда Никандрова пулчĕ, ентешсене вăл нормативсене çăмăллăн парăнтарма ăнăçу сунчĕ.

Положени тăрăх командăри кашни çыннăн гимнастика тенкелĕ çинче тăрса пĕшкĕнсе туртăнмалла пулчĕ. Кунсăр пуçне çурăм çине выртса кĕлеткене çĕклесси, перекладина çинче туртăнасси, пневматика винтовкинчен пересси, кире пуканĕ çĕклесси пачах та шиклентермерĕ массăллă информаци тытăмĕнче ĕçлекенсене. Кашниех кирлĕ чухлĕ очко пухма тăрăшрĕ пулин те, командăсем хушшинче ытларах туслă ăмăрту пулчĕ. Судьясем те кашнинчех: «Чи кирли - сывлăх. Хăвăра туйса пурнăçлама тăрăшăр хăнăхтарусене», - терĕç асăрхаттарса.

«Çĕнĕ спортзалта ГТО нормативĕсене пурнăçлама хăтлă пултăр тесе пур услови те туса панă. Волонтерсен пулăшăвĕ те питех те вырăнлă пулчĕ. Ĕçтешсемпе пĕрле хамăра тĕрĕслеме питех те кăсăклă. Фестиваль уяв пулса тăчĕ, савăк кăмăл парнелерĕ. Çĕнтерÿçĕсен йышне лекеймерĕмĕр, анчах та çакă вăл пăшăрханмалли сăлтав мар. Сывлăха çирĕплетес тесе çине тăрса ĕçлемеллине пĕлтерет çеç!» - терĕç редакци ĕçченĕсем.

Каламалла, пур тĕсре те «Çĕнтерÿ çулĕн» ĕçченĕсем япăх мар результатсем кăтартрĕç. Вĕсем пурте ГТО значокне илме тивĕçлĕ.

Ăмăртура вара малтанхи кăтартусемпе очкосен шучĕпе Татьяна Данилова хăйĕн ÿсĕмĕнче 1-мĕш, Руслан Волков 3-мĕш вырăн йышăннă. Район хаçачĕсем хушшинче «Çĕнтерÿ çулĕ» 1-мĕш вырăнта, пĕтĕмĕшле зачетра вара 5-мĕш йĕркере.

Хамăр инф.