Паян - Пĕтĕм тĕнчери инвалидсен кунĕ. Сывлăх тĕлĕшĕнчен хавшакрах çынсен пурнăçĕ, чăн та, çăмăл мар. Вĕсене пирĕн енчен тимлĕх те, ăшăлăх та кирлĕ. Ĕнер поселокри культура керменĕнче пĕлтерĕшлĕ куна халалласа пысăк мероприяти йĕркелерĕç. Ятлă-сумлă çынсемпе хăнасем те çитрĕç. «Эпир тĕрлĕрен, анчах та пĕрле!» - тесе çирĕппĕнех калама пулать.

Хевтесĕррисен чăннипех те аллисем ылтăн. Культура керменĕнче уçăлнă куравра тĕрленĕ-эрешленĕ, ăсталанă капăр япаласене курма тÿр килчĕ. Паллах, округри маçтăрсен ĕçĕсем те куракансене илĕртрĕç. Мероприятие килнисем Антонина Филимонова ăсталанă пуканесемпе тата унăн ытти ĕçĕсемпе те кăсăкланчĕç. Асилтеретпĕр, Антонина Яковлевна - округри пенсионерсен союзĕн председателĕ, Хĕрарăмсен канашĕн членĕ.

Инвалидсен Пĕтĕм Раççейри обществин регионти организацийĕн председателĕ Вероника Михайлова, Вăрнар тăрăхĕнчи уйрăмĕн ертÿçи Людмила Николаева, округ администрацийĕн культура пайĕн пуçлăхĕн заместителĕ Сергей Политов, Канашри инвалидсен обществин ертÿçи Анатолий Семенов тата ыттисем сусăррисене çирĕп сывлăх, ăнăçу сунчĕç. Инвалидсен обществин ĕçне хастар хутшăнакансем тĕрлĕ шайри наградăсене тивĕçрĕç.

Пĕтĕм тĕнчери инвалидсен кунĕ ячĕпе чаплă концерт пулчĕ. Калининăри шкул-интернатăн воспитанникĕсем, психикăпа неврологи интернатĕнче пурăнакансем тата ыттисем куракансене хаваслă кăмăл парнелерĕç. Ташлама та юрлама та, паллă поэтсен сăввисене илемлĕ вулама та ăста вĕсем. Шкул-интернатри Константин Якушин концертра палăрчĕ. Вăл кăвар чĕреллĕ поэтăмăрăн Çеçпĕл Мишшин «Хурçă шанчăк» сăввине мăнаçлăн каларĕ. Пултарулăх номерĕсене хатĕрлеме пулăшакан наставниксем пирки те ыр сăмахсем каламалла, вĕсем тĕллевлĕ тăрăшни яр уççăн курăнать. Уяв программи чăннипех те питĕ пуян пулчĕ.

Çак кунах шашка, джакколо енĕпе ăмăртусем те йĕркелерĕç. Мала тухнисене округ администрацийĕн грамотисемпе савăнăçлă лару-тăрура чысларĕç. Сывлăх енчен хавшакрах пулсан та чунпа вăйлине, çулсене пăхмасăр хастарлăхпа тата ĕçченлĕхпе палăрнине кăçал та çирĕплетрĕç. Хевтесĕррисене ăшă та çепĕç сăмахсем калакансем чылаййăн пулчĕç.

Елена ПОРФИРЬЕВА