Çулсерен декабрĕн 5-мĕшĕнче Раççейре Волонтер кунне паллă тăваççĕ. Çак хастарсене «ырă чĕреллисем» теççĕ. Вĕсем чун хушнипе пархатарлă тивĕçе пурнăçлаççĕ.

Чăваш енре ырă юхăмсен шучĕ чылай. Волонтерсен туслă ушкăнĕсенче - мал ĕмĕтлĕ те хавхалануллă çынсем, юратнă республикăпа тăван кĕтесĕн ырă пуласлăхĕшĕн ырми-канми тăрăшакансем.

Культура, спорт, экологи, патриотлăхпа тулнă мероприятисене те волонтерсем кăмăлпах хутшăнаççĕ. Вĕсемех çухалнă граждансене шырассипе çыхăннă ĕçсенче те хастар.

Пуçаруллă, яваплă çынсем хевтесĕррисене, кулленхи пурнăçра йывăр лару-тăрăва лекнĕ çемьесене те тимлĕхсĕр хăвармаççĕ.

Вăрнар ен доброволецĕсем те маттур. Чун ыйтнипе тăрăшаççĕ. Вĕсем ырă кăмăллă та уçă чунлă. Хастарсен мĕнпур пуçарăвĕпе ырă ĕçĕсем обществăна усă кÿреççĕ.

Волонтерсен кунне халалланă форум поселокри культура çуртĕнче иртрĕ. Волонтерсен пĕрлешĕвĕсен активисчĕсемпе лидерĕсем йышлăччĕ.

Мероприятие тĕрлĕ ÿсĕмри, тĕрлĕ профессири çынсем пухăнчĕç, вĕсенчен нумайăшĕ вĕренÿ учрежденийĕсенче ăс пухать кăна-ха. Анчах маттурсене ырă ĕçсем тума яланах хатĕр пулни пĕр тĕвве пĕрлештерет.

- Сире пĕтĕм чун-чĕререн уяв ячĕпе саламлатăп, пархатарлă тĕллевĕрсене пурнăçлас ĕçре пысăк ÿсĕм-çитĕнĕсем сунатăп, - терĕ Надежда Никандрова. - Волонтерсен ĕçĕ питĕ кирлине пурте ăнланаççĕ. Вĕсем ветерансене пулăшаççĕ, малашлăхшăн тăрăшаççĕ, халăх пурăнакан вырăнсене хăтлăх кĕртеççĕ.

Волонтер юхăмне аталантарма Вăрнар округĕнчи учрежденисемпе организацисен ĕçченĕсем те хастар хутшăнаççĕ. Пулăшу тата тимлĕх кирлĕ çынсемшĕн тăрăшаççĕ. Кĕмĕл волонтерсем тата мĕнлерех хастарлăхпа палăраççĕ. Ырă чунлă пенсионерсем пирĕн мăнаçлăх. Çамрăксене паха тĕслĕх кăтартаççĕ.

Çынна ырă ĕçсем илемлетеççĕ, теççĕ халăхра. Ку чăнах та çапла. Обществăна аталантарас тĕлĕшпе волонтерсем пысăк тÿпе хываççĕ. Форума хутшăнакансене вĕрентÿ тата çамрăксен политикин пайĕн пуçлăхĕ Алексей Фирсов та саламларĕ. Округри хастар волонтерсене пархатарлă ĕçшĕн, ыр кăмăлшăн чĕререн тав турĕ.

Ырă чĕреллисене наградăсем парса хавхалантарчĕç. Вăрнар округĕн администрацийĕн Тав çырăвне ял хуçалăх техникумĕн производство вĕрентĕвĕн мастерĕсем Светлана Алексеева, Галина Петрова, «Чăваш ен» патшалăх телевиденийĕпе радио корреспонденчĕ Альбина Фомина, культура учрежденийĕсенче тăрăшакансем Елена Мышкина ?Калинино%, Елена Германова ?Малтикас Ялтăра%, Венера Прокопьева ?Чăрăшкас Хирлеп%, Алина Илларионова ?Хирпуç%, Вероника Илларионова ?Уравăш%, Вăрнарти типĕтнĕ сĕт завочĕн водителĕ Григорий Васильев, Калининăри шкул- интернатăн сотрудникĕ Елизавета Муравьева, Кушар Юнтапари хушма хуçалăх ĕçченĕ Надежда Сергеева, Малти Ишек шкулĕнчи Надежда Григорьевăпа Елизавета Григорьева педагогсем, ял хуçалăх техникумĕн студенчĕсем Светлана Федотова, Анна Фуртинова, Ульяна Захарова, кĕмĕл волонтерсем - Çĕрпел тăрăхĕнчи Елена Трофимовăпа Тамара Гаврилова, поселокри Татьяна Павлова, Кушар Юнтапари Лилия Спиридонова - тивĕçрĕç.

Округ администрацийĕн вĕрентÿ пайĕн Хисеп грамотипе Ольга Варюхина педагога ?1-мĕш вăтам шкул%, Екатерина Игнатьева воспитателе ?«Ромашка» ача сачĕ%, Мария Кроткова вĕренекене ? Ярмушка шкулĕ%, Тавĕпе 1-мĕш шкулта ăс пухакансене София Варюхинăна, Марина Гаспаряна, Екатерина Гавриловăна, 2-мĕш вăтам шкул директорĕн советникне Анастасия Крючковăна наградăларĕç. Вĕрентÿ пайĕн Тав çырăвне тивĕçнисенчен чылайăшĕ шкулсенче ăс пухать. Акă, вĕсем - Ангелина Ефимова ? Ярмушкари шкул%, Анна Бурмистрова ?2-мĕш вăтам шкул%, Алексей Антоновпа Эвелина Краснова ?Санарпуç%. Пăртасри шкул директорĕн советникне Елена Макаровăна та чысларĕç.

Ятарлă çар операцийĕ обществăна пĕрлештерчĕ. Раççейре пурăнакансен пурин те пĕр тĕллев - çар служащийĕсене пулăшасси. Сцена çине СВО участникне - Çĕрпел ялĕнчи Алексей Никифорова – чĕнчĕç. Вăл ентешĕсене çар çыннисене пулăшнăшăн, ырă кăмăллă пулнăшăн пĕтĕм чун-чĕререн тав турĕ.

Волонтерсем маскировка сеткисем, ăшă япаласем çыхаççĕ, окоп çуртисем хатĕрлеççĕ. Ятарлă çар операцине хутшăнакансем валли тăтăшах гуманитари пулăшăвĕ яраççĕ.

Мероприятие йĕркелекенсем куракансем валли пуян программа хатĕрленĕ. Пултарулăх ушкăнĕсем илемлĕ номерсемпе савăнтарчĕç. Калининăри «Кружевницы», Хирпуçĕнчи «Шăпчăксем» ансамбльсем, Вăрнарти «Микс» хореографи коллективĕ куракансене çĕкленÿллĕ кăмăл-туйăм парнелерĕç.

Елена ПОРФИРЬЕВА