Сăпайлă ял каччи, анчах та çирĕп характерлă. Нихăçан та сиенлĕ йăласемпе туслашман. Тĕллевсене яланах пурнăçлама тăрăшнă. Ĕçченлĕхпе кăна палăрнă. Хушнине тĕплĕн пурнăçланă. Шкулта, районта иртекен спорт ăмăртăвĕсенче кашнинче хастар пулнă...

Чи пысăк ĕмĕчĕсенчен пĕри - çар çынни пуласси - мĕн ачаран тĕвĕленнĕ унра. Вăтам шкул пĕтерсенех пурнăçлама май килмен çакна, анчах та срочнăй служба хыççăн пурпĕр çар вĕренÿ заведенине кĕме пултарнă вăл. Салтакра та яланах тĕслĕхлисен ретĕнче пулнă. Сывлăш-десант çарĕсенче иртнĕ унăн служби. Парашютпа ăста сикнĕ, шутпа - 20 ытла. Çакăншăн çамрăка «За безупречную службу в ВДВ» медальпе те наградăланă.

2020 çулта Мускаври паллă-сумлă аслă çар училищине вĕренме кĕнĕ. Курсант вăхăтĕнче Кремльти Хĕрлĕ площадьре Аслă Çĕнтерÿ кунĕнче иртекен çар парадне виçĕ çул харăс хутшăннă. Кунтан 2023 çулхи декабрьте лейтенант званипе алла диплом илнĕ.

2024 çулхи февральтен - ятарлă çар операцийĕнче. Штурм взвочĕн командирĕ. Июльте ăна Кăнтăр çар округĕн 8-мĕш çарĕн мотострелоксен 4-мĕш ротин командирне çирĕплетнĕ. Çапăçури паттăрлăхшăн, çар задачисене тĕрĕс те пахалăхлă пурнăçланăшăн «Çар ĕçĕн ветеранĕ», «Çапăçура палăрнăшăн», Жуков медалĕсемпе, Хăюлăх орденĕпе наградăланă.

Анчах та ун пурнăçĕ кăçалхи кĕркунне, октябрĕн 3-мĕшĕнче, Донецк халăх Республикин территорийĕнче çар заданине пурнăçланă вăхăтра дронсен атакине пула татăлнă. 24-ри паттăр салтака Донецк халăх Республикин Геройĕ ятне панă. Вилнĕ хыççăн...

Ку паттăр - Анаткас Хапăс каччи Юлиан Волков. Çак çухату çемьешĕн, ял çыннисемшĕн кăна мар, пĕтĕм Раççей çарĕшĕн йывăр пулчĕ.

Тĕрĕслĕхшĕн çунакан çын, маттур, ăслă, шанчăклă юлташ, ырă чунлă, юратнă ывăл... Пурăннă пулсан çĕршыва тата мĕн чухлĕ усă кÿмеллеччĕ... Пултаруллă спортсмен. Районти, республикăри ăмăртусен çĕнтерÿçи. «Çĕнтерÿ çулĕ» хаçат эстафетине те хастар хутшăнатчĕ... Ĕнер тăван шкулĕнче, Хапăсра, ун ячĕпе Герой парттине уçнă вăхăтра салтак ячĕпе мĕн чухлĕ ăшă сăмах янăрарĕ!

Мероприятие хутшăннă май, округ пуçлăхĕ Надежда Никандрова, шкул директорĕ Оксана Жебелевская, пиччĕшĕсем, юлташĕ, çывăх çыннисем Юлиан ыттисен пурнăçĕшĕн пуçне хунине, вăл яланах ентешсен чĕрисенче юлассине палăртрĕç, ашшĕ-амăшне, тăванĕсене витĕмлĕ сăмахсемпе хавхалантарчĕç.

Юлиан аслашшĕн, аслă куккăшĕсен паттăрлăхне тĕслĕхе хывса ÿснĕ. Аслашшĕ Илья Павлович Волков, унăн Константин тата Григорий шăллĕсем фашиста хирĕç кĕрешнĕ. Куккăшĕ Алексей Александрович Николаев, Юлиан пекех 20-рен иртнĕ каччă, Тăван çĕршывăн Аслă вăрçин хирĕнче пуçне хунă.

Амăшĕ Людмила Борисовна Волкова чĕринчи хуйхине пусарса пухăннисене ывăлне сума сунăшăн тав турĕ. Юлиан çав тери çар çынни пулас тенине тĕслĕхсемпе çирĕплетрĕ.

Паттăрсем вилмеççĕ. Герой партти шăпах та Тăван çĕршывăн Геройĕсен кунĕнче уçăлчĕ. Юлиан Волковăн ятне, хăйĕн мухтавлă выпускникне ĕмĕр асра тытас ĕçе Хапăс шкулĕ нихăçан та пăрахмĕ...

Светлана ЧИКМЯКОВА