Кăçал Çемье çулталăкĕ. Пирĕншĕн вара - вĕрентекенсемшĕн - ĕç вырăнĕ иккĕмĕш кил, вĕренекенсем пирĕн çемье тесе калас килет. Çавăн пек пĕр-пĕринпе çывăхланатпăр. Тĕл пулсан та хамăр ачасем пирки мар, ушкăнра вĕреннĕ ачасен шăписем, вĕсен çитĕнĕвĕсем çинчен мухтанса калаçас килет.

Эпир вĕсене тарăн пĕлÿ пама тăрăшнă, суйласа илнĕ профессине юратма хăнăхтарнă. Уйрăмах диплом панă кунсем хумхануллă иртнĕ. «Хăçан тепĕр хут тĕл пулăпăр е çук» текен шухăшсем, савăнăç куççульне тытса чарайман вăхăтсем темĕн чухлех пулнă.

Нумай çул пĕрле ĕçлесен коллектив та çемье пекех пулса тăрать. Тивĕçлĕ канăва тухнă пулин те пĕр-пĕринпе туслă çыхăнăва çухатмастпăр. Çак кунсенче хисеплĕ ĕçтеше Нина Никифоровна Гусевана 85 çулхи юбилей ячĕпе саламларăмăр. Нина Никифоровна Çĕрпелте çуралса ÿснĕ. Çичĕ класа ялти шкулта пĕтернĕ, 8-10-мĕш классенче Уравăшри шкулта ăс пухнă. 1957 çулта Чăваш ял хуçалăх институтне агронома вĕренме кĕнĕ. Студент вăхăтĕнче икĕ хутчен Алтайпа Казахстана çĕнĕ çĕрсем уçма кайнă. «За освоение целинных земель» медале тивĕçнĕ.

Алла агроном дипломне илсен Нина Никифоровна пĕр вăхăт «Янгорчино» колхозра агроном-хăмла ăстинче, Ленин ячĕллĕ колхозра агроном-вăрлăх ăстинче ĕçленĕ. Каярахпа Элĕк шкулĕнче ачасене пахчаçимĕç ÿстерес ăсталăха вĕрентнĕ.

1965 çултан пуçласа мĕн тивĕçлĕ канăва тухичченех Вăрнарти 8-мĕш училищĕре преподавательте тăрăшнă. Нина Никифоровна пĕр вăхăт Вăрнарти совхоз-техникумра та вăй хунă.

- Кăçал техникумран агронома вĕренсе тухнăранпа 50 çул çитнине уявлама тĕлпулăва пухăннă выпускниксем кăмăла çĕклерĕç, - тет вĕрентекен. Чăннипех те хамăрăн студентсем манса кайманни, пысăка хурса хаклани пирĕншĕн телей.

Юбиляра Вăрнарти ял хуçалăх техникумĕн директорĕ Ольга Валерьяновна Львова та Тав хучĕ парса саламларĕ.

Нина Никифоровна ĕç ветеранĕ. Нумай çул тивĕçлĕ канура пулин те алă усса лармасть, салфеткăсемпе тыткăчсем çыхать. Хăй çине уртса янă шурă тутăрĕ те - хăй ăсталани. Çуллахи вăхăтра пахчара тем тĕрлĕ чечек, теплицăра хăяр-помидор çитĕнтерет. Ĕçлемесĕр пурăнма пултарайманнине палăртать ветеран. Сывлăхне те тимлĕх уйăрать, кашни ир-каç скандинави туйисемпе утать.

Çемье çулне пĕтĕмлетсе кăçалхи юбилярсене - Владимир Васильевич Егорова - 75, Валерий Андреевич Александрова - 75, Яков Семенович Петрова - 75, Лидия Васильевна Краснована - 75, Рюрик Викторович Николаева - 70, Валентина Ивановна Иванована - 70, Валентина Ивановна Панькована - 65, Петр Николаевич Васькова - 60, Светлана Петровна Самарована 65 çавра çулĕсемпе ăшшăн саламлатпăр, çирĕп сывлăх, вăрăм ĕмĕр, таса тÿпе сунатпăр.

Вăрнарти 29-мĕш училищĕре ĕçлесе тивĕçлĕ канăва тухнă ветерансем