Вăйлă. Чаплă. Маттур! - терĕç агропромышленность комплексĕн ветеранĕсем ытларикун Вăрнарти хăйминчен уйăрнă типĕтнĕ сĕт заводĕнче пулнă май. Тивĕçлĕ канури çĕр ĕçченĕсен кăçалхи пĕтĕмлетÿллĕ канашлăвĕ шăпах кунта иртрĕ.

Ветерансем производствăпа кăмăлласах паллашрĕç, сĕт-çу-турăх сĕтелсем çине çитиччен мĕнлерех «шăранса» тухнине кăмăллăн сăнарĕç. Предприятин хăвачĕ ÿссех пынипе тĕлĕнни, савăнни вĕсен сăнĕсенче аван курăнчĕ.

Сĕт заводĕнче паян 130 çын тăрăшать. Цехсем талăкĕпе ĕçлеççĕ. Федор Волков директор çитес çул çĕнĕ производство та хута каяссине пĕлтерчĕ. Строительство ĕçĕсем пыраççĕ ĕнтĕ. Çĕнĕ корпус 1200 тăваткал метр йышăнĕ. Кунта сыр тата çурмафабрикатсем кăларма тытăнĕç. Çынсене урăх çĕртен те явăçтарас тĕллевпе общежити те çĕклесе лартнă, ку объектра халĕ шалти ĕçсем пыраççĕ.

Завод ĕçĕ-хĕлĕпе киленнĕ хыççăн ветерансем çавра сĕтел тавра пухăнса пĕлтерĕшлĕ ыйтусене сÿтсе яврĕç. Пухăннисене Вăрнар округĕн пуçлăхĕ Надежда Никандрова, ветерансен республикăри Союзĕн председателĕ Александр Самылкин саламларĕç. Округри ветеран-аграрисен Канашĕн ертÿçи Роберт Петров обществăлла ĕçре маттур пулнăшăн пурне те тав турĕ.

Тивĕçлĕ канурисем, чăн та, округ пурнăçне хастар хутшăнаççĕ. Вĕсене культура, спорт мероприятийĕсенче, шкулти тĕлпулусенче, ытти çĕрте курма пулать. Маттур хĕрарăмсем ятарлă çар операцине пулăшас ĕçрен юлмаççĕ.

Çитес çул планĕ те пысăк. Раççейре те, Чăваш енре те 2025-мĕшне патриотизм темине халалланă май, ку енĕпе мероприятисем чылай иртмелле. Округ пуçлăхĕ Надежда Никандрова аслă ÿсĕмрисене вĕсене хастар хутшăнма чĕнчĕ.

Кăçалхи çула ветерансен АПК Канашĕ паллă пулăмпа вĕçлесшĕн. Декабрĕн 26-мĕшĕнче Çĕрпел салинче хамăрăн паллă ентешĕмĕрĕн, производствăн мухтавлă организаторĕн, нумай çул «Янгорчино» хуçалăха ертсе пынă Василий Игнатьевич Романовăн çурчĕ çине Астăвăм хăмине вырнаçтарасшăн. Сăмах май, мероприятие пурне те йыхравлаççĕ.

- Çакнашкал тĕлпулусем кăмăл-туйăма çĕклеççĕ кăна мар, тивĕçлĕ канурисем те общество пурнăçĕнче кирлине çирĕплетеççĕ, - терĕ Туçи Çармăсри Олег Никишов.

Светлана ЧИКМЯКОВА