Çĕнĕ çул çывхарать. Хаçатăн хастар вулаканĕсем малалла та «Çĕнтерÿ çулĕпе» туслă пуласшăн. Тĕрлĕ ĕçсенче тăрăшсан та чун çимĕçĕ валли яланах вăхăт уйăрма тăрăшаççĕ. Вăрнар ен хыпарĕсемпе паллашсах тăраççĕ.

Акă, Вăрнар округĕн депутатсен Пухăвĕн депутачĕ, «Энергостроймонтаж» общество директорĕ Рифкат Киметов - хаçатăн шанчăклă тусĕ. Ĕç коллективĕнчи 5 хастара тата 3 ветерана 2025 çулхи пĕрремĕш çур çул валли «Çĕнтерÿ çулĕ» çырăнса пачĕ.

- «Çĕнтерÿ çулĕ» тăван округри хыпарпа паллаштарать. Ăс парса ырра вĕрентет. Çивĕч ыйтусем çĕклет. Çавăнпа та тăван ен хаçатне вуламаллах, - терĕ Рифкат Шамдинович.

Тĕрĕс те витĕмлĕ сăмахсем. Депутатран ыттисен те тĕслĕх илсен аван.

«Çĕнтерÿ çулне» çырăнса панăшăн Вăрнарти Любовь Афанасьевна Молостова тата Николай Григорьевич Борисов Рифкат Шамдиновича чун-чĕререн тав турĕç. Любовь Афанасьевна чылай çул «Энергостроймонтаж» обществăра диспетчерта ĕçленĕ. Халĕ тивĕçлĕ канура.

- «Çĕнтерÿ çулĕ» - юратнă кăларăмсенчен пĕри. Ачаранпах эпĕ тăван хаçата юратса вулатăп, кашни номере чăтăмсăррăн кĕтетĕп, - терĕ Любовь Молостова. Вăл кашни статьянах тĕплĕн тишкерет. Ырă, ĕçчен, сăпайлă чăваш хĕрарăмĕн ачисемпе мăнукĕсем те «Çĕнтерÿ çулĕпе» туслă. Тăван хаçата вулани çĕршыва юрăхлă, ятлă-сумлă çынсем пулса çитĕнме пулăшать. Тăван чĕлхене юратма, чăваш йăли-йĕркисене хисеплеме вĕрентет.

Николай Борисов пурнăç ÿкерчĕкĕсене, çĕнĕ кун хыпарĕсене уйрăмах вулама кăмăллать. Ветеран интернетра çырнине мар, хаçата алăра тытса вулама юратать. «Усăллă та интереслĕ информаци нумай»,- терĕ вăл.

Вăл Кÿлхĕрринче çуралса ÿснĕ. Пĕчĕкренех ĕçре пиçĕхнĕ. Çитĕнсен тĕрлĕ организацире тăрăшнă, тÿрĕ кăмăлпа тимленĕшĕн ырă ят-сума тивĕçнĕ. «Спецмонтажгаз» предприятирен пенсие тухнă, слесарьте вăй хунă. Ачаранпах хаçатпа туслă çыхăну тытать. Вулаканăн ăс-хакăлĕпе шухăшлавĕ, тĕнчекурăмĕ те пуян.

Рифкат Киметов, каламалла, ытти çулсенче те ветерансене район хаçатне çырăнса панăччĕ. Вăл шантарнă сăмаха яланах тытать. «Çĕнтерÿ çулне» çырăнса илнисем хушшинче тĕрлĕ ÿсĕмри çынсем пур. Хаçат редакцийĕ вĕсене пурне те Çĕнĕ çулпа саламласа вăрăм ĕмĕр, çирĕп вăй-хал, ăнăçу тата малашлăха шанчăклăн пăхма сунать.

Елена ПОРФИРЬЕВА