Районти культура çуртĕнче иртнĕ «Кашнин чĕринче - Раççей» ыркăмăллăх концертĕнче çак шухăш кашни номертех палăрчĕ. Пĕтĕм Раççейри «Навигаторы детства» проект хастарĕсем пуçарнипе вăл кăçал та активлă иртрĕ.

Округри шкулсем ятарлă çар операцийĕ тытăннăранпах фронта пысăк пулăшу кÿреççĕ. Çырусем, открыткăсем çырнисĕр, талисмансем ăсталанисĕр пуçне вĕсем окоп çуртисем хатĕрлес, маскировка сечĕсем çыхас ĕçе та хастар хутшăнаççĕ. Ак, ыркăмăллăх концерчĕ тĕлне шкулсемпе ача сачĕсем салтаксем валли ăшă япаласем, салфеткăсем, ытти япаласем пуçтарнă.

Концерт пуçланиччен РДК фойи ăсталăх лаççине çаврăнчĕ. Шкул директорĕсен советникĕсем пухăннисене тĕрлĕ мастер-классене йыхравларĕç. Вĕсем пурте салтаксене хавхалантарас тĕллевпе çыхăнчĕç.

Концерта килнĕ кашни çын хăй ырă тунине туйма пултарчĕ. Мĕншĕн тесен билетран пухăннă мĕнпур укçа-тенке хамăр ентешсене пулăшма «ZOV Вурнары» волонтер ушкăнне парĕç. Çавăн пекех - гуманитарипе тултарнă коробкăсене те.

Пĕрлĕх, пулăшу туйăмĕ сцена çинче те аван курăнчĕ. Кашни номер патриотизма çĕклерĕ, ытларахăшĕ çар, Çĕнтерÿ темине пĕрлештерчĕ. Маттур артистсен йышĕнче - Санарпуç, Ярмушка, Вăрнарти 1-мĕшпе 2-мĕш, Кÿстÿмĕр, Мăн Явăш, Аçăмçырми шкулĕсен вĕренекенĕсем, «7 нот» ансамбль тата «МИКС» ташă ушкăнĕ. Директорсен советникĕсем те аякра юлмарĕç - пĕрлехи «Моя Россия» номерĕ чунсене хăпартлантарчĕ.

Округ пуçлăхĕн заместителĕ Алексей Фирсов, «Навигаторы детства» проектăн республикăри координаторĕ Наталья Иванова паянхи кун пĕрлĕхлĕ пулни, Çĕнтерĕве тÿпе хывма тăрăшни чи пысăк хаклăхсем пулнине палăртрĕç.

Раççей вара - кашнин чĕринче. Ыркăмăллăх концерчĕ çакна аван кăтартрĕ.

Светлана ЧИКМЯКОВА