Уй-хирте ырми-канми ĕçлесе тырпул çитĕнтернипе кăна ял хуçалăх организацийĕсен экономикине тĕреклетме йывăртарах, паллах. Çĕр ĕç продукцийĕн тупăшĕ çине çанталăк условийĕсем те витĕм кÿреççĕ. Вăйлă тухăçа вăхăтра пухаймасан кĕрхи пÿлмесем те пушăрах пулĕç.

Çав вăхăтрах выльăх-чĕрлĕх ĕрчетнипе кулленех кассăна чĕрĕ укçа кĕрет. Ферма çăкăр çитерет тенине те илтме пулать. Обществăлла выльăх-чĕрлĕх ăнăçлă хĕл каçсан аш-пăш, сĕт туса илесси ÿсет. Производствăпа экономика кăтартăвĕсем лайăхланаççĕ.

Палăртмалла, ферма ĕçченĕсен хĕллехи каникул çук. Вĕсем кунсерен выльăх-чĕрлĕх объекчĕсем еннелле çул такăрлатаççĕ, хăйсен тивĕçĕсене чыслăн пурнăçлаççĕ. Çак эрнере округри ветеринари станци пуçлăхĕ Владимир Матвеев, ял хуçалăхĕпе экологи пайĕн ертсе пыракан специалисчĕ Людмила Капитонова темиçе хуçалăха та çитрĕç, обществăлла выльăх-чĕрлĕхе мĕнле условисенче тытнине тĕрĕслерĕç. Чи малтан «Хорнзор» кооперативра пулчĕç. Хуçалăх ертÿçи Михаил Яковлевич Максимов вĕсене тарават кĕтсе илчĕ. Вăл Владимир Матвеевпа тата Людмила Капитоновăпа пĕрле ферма тăрăх утса тухрĕ. Ĕç çыннисем шултра мăйракаллисене йĕркеллĕ пăхни тÿрех палăрать. Ĕнесем пĕр тикĕссĕн кавлеççĕ. Хушка пуçсене вăхăтра ăшă шыв ĕçтереççĕ. Тислĕкне те тасатсах тăраççĕ. Ферма тупăшĕ уй-хиртен килнине те палăртмалла. Пахалăхлă утă, сенаж çителĕклĕ. Ешĕл масса хывас технологисене пăхăнасси - тĕпре.

Сĕт - тупăшăн çăлкуçĕ. Ĕнесем хуçалăхра 80 пуç. Хальхи вăхăтра пĕр тоннăна яхăн сĕт суса илеççĕ.

Çуртрисем те, кĕрхисем те çитĕнеççĕ çуллен «Хорнзор» кооперативăн уйĕсенче. Кăçал вăтам тухăç 25–30 центнерпа танлашнă. Хăшпĕр çулсенче сарă ылтăна тата ытларах пухса илнĕ. Михаил Яковлевич - Чăваш Республикин тава тивĕçлĕ агрономĕ. Тырпул çитĕнтерес енĕпе опычĕ пысăк.

Хуçалăх пурăнсан ял та пурăнать. Хресчен чунĕллĕ ертÿçĕ хастарсем валли тăван тăрăхрах ĕç вырăнĕсем пулччăр тесе тăрăшать. Хурăнсур-çармăссем те йăх-несĕлĕмĕрсен ятне ямаççĕ, уй-хирте те, фермăра та ĕçлеме ÿркенмеççĕ. Вĕсен кил хуçалăхĕсем те çирĕп, чылайăшĕн хурçă утсем те пур.

Самана варкăшĕ тĕрлĕрен вăл. Хуçалăх тилхепине тытса пыма çăмăл мар. Тĕрлĕ çивĕч ыйтусем те сиксе тухаççĕ. Ертÿçĕ: «Йывăр пулсан та - малаллах!» - терĕ. Михаил Максимов производствăпа экономика кăтартăвĕсене тата лайăхлатас, продукци ытларах туса илес тĕллевлĕ. Кооперативра, акă, малтан пăрусем тытнă корпуса çĕнетсе сĕт-çу ферми уçасшăн. Сĕт пăрăхĕсем вырнаçтарма, ĕç условийĕсене лайăхлатма палăртаççĕ. Хальхи вăхăта хуралтă тăррине çĕнĕрен витнĕ ĕнтĕ. Укçи-тенки те самай тăкакланнă. Паллах, ĕç кăтартăвĕсем чакмасан çитес çул кооперативăн патшалăх пулăшăвне тивĕçме май пур.

Елена ПОРФИРЬЕВА