Округри ветеринари станци пуçлăхĕ Владимир Матвеев, ял хуçалăхĕпе экологи пайĕн ертсе пыракан специалисчĕ Людмила Капитонова чылай аграрлă предприятие çитсе курчĕç ĕнтĕ.

Ял хуçалăх отраслĕн экономикине тĕреклетессипе выльăх-чĕрлĕх пăхакансем тĕллевлĕ тăрăшнине палăртрĕç. Паллах, сĕт-çу фермисенче ĕçлеме çăмăл мар. Лавккари сентресем сĕт юр-варĕпе пуян пулччăр тесен ĕне сăвакансен ир-ирех ура çине тăрса ĕçе тытăнмалла.

«Победа» кооператив ĕçченĕсем пирки те ыр сăмахсем каламалла. Вĕсем производствăпа экономика кăтартăвĕсене лайăхлатас тесе ырми-канми тăрăшаççĕ. Шанса панă ĕçе кашниех тÿрĕ кăмăлпа пурнăçлать.

Ĕне выльăх алла пăхать, теççĕ. «Победа» кооперативри обществăлла выльăх-чĕрлĕхе хĕллехи вăхăтра йĕркеллĕ условисенче, ăшă витесенче, тытаççĕ. Пахалăхлă апатпа тăрантараççĕ. Ешĕл масса та çителĕклĕ. Анчахрах кун çути курнă пăрусене ытармалла мар. Вĕсене те ытти выльăх пекех тĕплĕ пăхаççĕ. Çамрăк выльăхсем кунран-кун ÿт хушаççĕ. Сĕт-çу ферминче тирпейлĕх хуçаланать. Чĕрчунсене вăхăтра шăвараççĕ. Виçĕ çул каялла ферма территорийĕнче çĕнĕ шыв башнине çĕкленĕ. Ăшăрах çанталăкра шултра мăйракаллисене ирĕке кăлараççĕ, картана ярса уçăлтараççĕ.

Ĕне выльăх усранипе тăкаксем сахал мар пулин те тăрăшса, ĕçе пĕлсе йĕркелени аталану çулĕпе пыма май парать. Акă, «Победа» кооператива чылай çул Алевтина Петровна Семенова ăнăçлă ертсе пырать. Вăл - Чăваш Республикин ял хуçалăхĕн тава тивĕçлĕ ĕçченĕ. Выльăх-чĕрлĕх, ÿсентăран отраслĕсене аталантарас енĕпе унăн опычĕ пысăк.

Кăçалхи тăхăр уйăхри ĕç кăтартăвĕсем тăрăх «Победа» кооператив округри ял хуçалăх предприятийĕсем хушшинче виççĕмĕш вырăн йышăннă. Алевтина Петровна чăннипех пултаруллă организатор. Самана таппинчен юлмасть, мехпарка çулленех çĕнетессине пысăк тимлĕх уйăрать. Хăшпĕр арçын-ертÿçĕсен те унран тĕслĕх илмелле-тĕр. Ял хуçалăх отраслĕнчи пысăк кăтартусемшĕн Алевтина Семенова сумлă наградăсене темиçе хутчен тивĕçнĕ. Анчах та маттур ертÿçĕ мухтанма юратмасть. Алевтина Петровна кооперативра тăрăшакансен ĕçченлĕхне, хастарлăхне палăртрĕ. Хальхи вăхăтра хирпуçсем тонна ытла сĕт суса илеççĕ. Шурă ылтăн - тупăш çăлкуçĕ. Сĕт лайăх хакпа сутăнать. Раштав уйăхĕн 1-мĕш тĕлне вăтам сăвăм 4806 килогрампа танлашнă. Паллах ĕнтĕ, çуркунне ĕнесем йышлăн пăрулама тытăнсан, продукцие илесси тата ÿсĕ. Кооперативра ĕнесен шучĕ -135 пуç. Пĕтĕмпе шултра мăйракаллă выльăх-чĕрлĕх вара 400 пуçран иртет.

Хирпуç ялĕн пурнăçĕ пирки каласанах кашнинче тÿрех ура çинче çирĕп тăракан «Победа» хуçалăх куç умне тухать. Кунта ĕç коллективне хисеплеççĕ. Шалу та тивĕçлĕ тÿлеççĕ, хавхалантармалли майсемпе те туллин усă кураççĕ. Пур тăрăшакан та малалла та тăван хуçалăхрах вăй хурасшăн. «Пирĕн кооперативра питĕ лайăх тÿлеççĕ. Урăх ĕçе вырнаçасси пирки пуç ватмастпăр та», - теççĕ хастарсем. Вĕсем ертÿçĕ пирки те ыр сăмахсем каларĕç.

Ял хуçалăхĕпе экологи пайĕн даннăйĕсем тăрăх, малашлăхшăн тăрăшакан ытти предприятире те ĕç çыннисене тивĕçлипе хаклаççĕ, шалу ÿстерес тесе нумай тăрăшаççĕ. Пултаруллă ертÿçĕсем «кадрсем пĕтĕмпех татса параççĕ» тенине асрах тытаççĕ. Çывхарса килекен Çĕнĕ çул ячĕпе «Победа» кооперативра вăй хуракансене те, ытти аграри организацийĕсенче ĕçлекенсене те чун-чĕререн саламласа çĕнĕ çитĕнÿсем тума ырлăх-сывлăх, ăнăçу сунас килет.

Елена ПОРФИРЬЕВА