Паян библиотека вулав çурчĕ кăна мар. «Культура» наци проекчĕ, федераллă тата республика программисем пулăшнипе вĕсем тĕрлĕ интерессемлĕ çынсене кăсăклантаракан, пĕрлештерекен вырăнсем пулса тăраççĕ. Унсăр пуçне - çĕнĕ йышши технологисемпе пуян нумай функциллĕ центрсем те. Çакăнпа ăнлантарма пулать ĕнтĕ аслисем те, ача-пăча та библиотекăна ытларах та ытларах туртăнма тытăннине.

Халĕ çамрăксене кунта илĕртекен тепĕр сăлтав пур. Вăл - Çамрăксен хутшăнăвĕн территорийĕ ?ТОП%. Ку площадкăсем декабрь вĕçĕнче республикăри тата 10 модельлĕ библиотекăра уçăлнă. Пĕри - пирĕн округри Çĕрпелти çĕнелнĕ библиотекăра. Çак ятпа кунта торжествăлла мероприяти те иртнĕ. Тĕрĕссипе, вĕсем - çамрăксене творчествăпа ăс-тăн таланчĕсене, лидер туртăмĕсене аталантарма пулăшакан, çав вăхăтрах «хăрушлăх ушкăнĕнчи» ачасене те усăллă ĕçсемпе кăсăклантаракан вырăнсем.

Çĕрпелте те ку Территори çамрăксем тĕл пулмалли, пĕр-пĕринпе хутшăнмалли, хумхантаракан темăсемпе калаçмалли, тренингсемпе консультацисем, мастер-классем ирттермелли, пĕр шухăш-тĕллевлисене пуçтаракан площадка пулĕ. Çакна валли халĕ модельлĕ библиотекăра ресурс бази пуян. Çитменнине, кунта шкул ачисем фильмсем, спорт ăмăртăвĕсем пăхма, сĕтел çи вăййисене выляма, урăхла каласан хăйсен интересĕсене кура усăллă ĕçсене хутшăнма, çапла майпа активлă пурнăç йĕркине явăçма пултараççĕ.

Уçăлнăранпа нумай вăхăт та иртмен, ку Территори ача-пăчана кăмăла кайни халех яр уççăн курăнать. Хĕллехи каникул вăхăтĕнче Çĕрпелти библиотекăран вĕренекенсем татăлман. Вăл тус-юлташсен, пĕрле пĕлÿ пухакансен, канăва интереслĕ ирттерме юратакансен тĕлпулу вырăнĕ пулса тăнă. Ачасем библиотекарьсем сĕннĕ вăйă-тĕрĕслевсене, занятисене, ăс-тăн ăмăртăвĕсене, пултарулăх мастер-класĕсене килĕштерсе йышăннă, вĕсене пысăк хастарлăхпа хутшăннă.

- Çамрăксен хутшăнăвĕн территорийĕ - çĕнĕлĕхсен, хастарлăх, туслăх вырăнĕ, - теççĕ вĕсем савăнăçне пытармасăр.

Ирина ЯКОВЛЕВА