Республикăра яллă вырăнсенчи чи лайăх муниципаллă культура учрежденийĕсемпе вĕсен ĕçченĕсене палăртнă. Конкурс суйлавĕнче мала тухнисем кăçал укçан хавхалантарăва тивĕçĕç.

Чăваш ен Культура министерстви пĕлтернĕ тăрăх, конкурса хутшăнма кăмăл тунисенчен 46 заявка йышăннă: 29-шĕ - муниципаллă культура учрежденийĕсенчен, 17-шĕ - ку сферăри организацисен ĕçченĕсенчен. «Чи лайăх муниципаллă музей» номинацире, пĕр заявка кăна килнĕрен, конкурс çĕнтерÿçисене палăртайман. Ытти ушкăнсенче вара вĕсене пухнă балсене кура суйласа илнĕ.

Питех те савăнтарать: пуринчен маттур тимлекен культура учрежденийĕсемпе работникĕсем хушшинче вăрнарсем те пур. Яллă вырăнти чи лайăх библиотекăсен йышне, акă, Малтикас Ялтăрари библиотека та кĕнĕ. Ун ĕçне конкурс комиссийĕ чи пысăк хак панă. Библиотекарĕ - Елена Германова.

«Ялти культура çурчĕн чи лайăх ĕçченĕ» номинацире те пирĕн ентеш çĕнтерÿçĕсен ретĕнче. Вăл - Уравăш ял клубĕн заведующийĕ Вероника Илларионова. Унăн культура аталанăвĕнчи ÿсĕмĕсене те чăннипех тивĕçлипе хакланă.

Вулакансем пĕлеççĕ ĕнтĕ, çак хастарсем çынсене кĕнекепе туслаштарас тата культура пурнăçне явăçтарас тĕллевпе пысăк ĕç тăваççĕ. Халăха куллен тĕрлĕ мероприятисене явăçтараççĕ. Вĕсен активлăхне, тăрăшулăхне пулах ĕнтĕ ял çыннисем канăва тĕрĕс йĕркелеççĕ.

Çĕнтерÿçĕсене саламлатпăр, юратнă ĕçре малашне те пысăк ăнăçусем тума сунатпăр.

Ирина ЯКОВЛЕВА