Вăрнарти искусствошкулĕнче вĕрентекен Елена Есенцевана «Чăваш Республикин культурăн тава тивĕçлĕ ĕçченĕ» хисеплĕ ят панă. Указа республика Пуçлăхĕ Олег Николаев 2024 çулхи декабрĕн 25-мĕ-шĕнче алă пуснă.

Елена Николаевна - талантлă, пултаруллă педагог. Нумай çул вăл ачасене ÿнер тĕнчин вăрттăнлăхĕсемпе паллаштарать, илемлĕхе туйма, курма вĕрентет, ăсталăха туптаса аталантарма пулăшать. Вĕрентÿ процесне кăсăклă йĕркелет, тĕрлĕ мелсемпе, меслетсемпе ăнăçлă усă курать. «Пленэр», «Скульптура», «Живопись», «Ÿкерчĕк» тата ытти вĕрентÿ программисен соавторĕ.

Маттур педагогăн пултарулăхĕ нумай енлĕ: вăл тĕрлĕ техникăпа илĕртÿллĕ пуканесем ăсталать, пусма çине ÿкерессипе, халăх алăсталăхĕпе интересленет. Çавăн пекех Елена Николаевна - тĕрĕ ăсти те. Вăл - «Сурпан Пĕрле» акци ?2020 ç.% валли Вăрнар районĕнчен пĕр сыпăка тĕрлекенĕ. Вăрнар районĕн тĕрленĕ карттин авторĕ тата ăна илемлĕ эреше çавăраканĕ ?«Вăрнар районне тĕрлетпĕр» проект, 2022 ç.%. Елена Есенцеван «Актриса» скульптура портречĕ Чăваш патшалăх художество музейĕн фондĕнче вырăн тупнă.

Елена Николаевна професси ăсталăхне ÿстерес тĕллевпе тĕрлĕ конкурссене, пултарулăх ĕçĕсен куравĕсене активлă хутшăнать, интереслĕ мастер-классем йĕркелет.

Унăн вĕренекенĕсем те хастар, округ, республика, Раççей шайĕнчи конкурссенче пĕрремĕш вырăнсем йышăнаççĕ. Вăрнарти чукун çул вокзалĕнче йĕркелекен куравсенче вĕсен ĕçĕсемпе паллашса киленме пулать. Паллă ÿнерçĕ, пирĕн ентеш, халĕ Питĕрте пурăнакан Алина Иванова-Хоняк та пултарулăхри пĕрремĕш утăмсене Елена Есенцева патĕнче тунă.

Пысăк награда илнĕ ятпа Елена Николаевнана ăшшăн саламлатпăр, малалла та çĕнĕрен те çĕнĕ ÿсĕм-çитĕнÿсем патне ăнтăлма хавхалану, иксĕлми вăй-хал сунатпăр.

Оксана СЕМЕНОВА