Чăваш ен Пуçлăхĕ Олег Николаев творчествăри ăнтăлушăн 1 пин çамрăка ятарлă стипендипе хавхалантарас Указа алă пуснă. Кăçал комисси 2062 заявкăна пăхса тухнă. Вăл шутра шкулта вĕренекен 681 ачана, ĕçлекен 205 çамрăка тата обществăлла пĕрлĕхсен 114 представительне стипенди уйăрнă. Ун виçи уйăхсерен 2500 тенкĕпе танлашать.

Кăçал Вăрнар округĕнче пурăнакансем стипендиатсем шутне ытлараххăн кĕнĕ. Округри учрежденисенчен тăратнисем хушшинче саккăрăн. Вĕсем:

Оксана Васильева - Ярмушка шкулĕнче вĕренекен,

Ксения Данилова, Галина Костянецкая тата Антон Федоров - Вăрнарти 2-мĕш шкулта вĕренекенсем,

Екатерина Игнатьева - Вăрнар поселокĕнчи 3-мĕш «Ромашка» ача сачĕн воспитателĕ,

Марина Михайлова - Раççей ШĔМ-ĕн полицин «Вурнарский» пайĕн участокри уполномоченнăйĕ,

Екатерина Трифонова тата Светлана Федотова - Вăрнарти ял хуçалăх техникумĕн студенчĕсем.

Ку çамрăксенчен чылайăшĕн çитĕнĕвĕсем пирки вулакансем аван пĕлеççĕ. Антон Федоров, ак, спортра маттур. Галина Костянецкая - ăста ÿкерÿçĕ. Тĕрĕссипе, вĕренекенсем - пурте коллективсен хастарĕсем. Шкул-техникумăн обществăлла пурнăç аталанăвне вĕсем хăйсен шухăшне, вăхăтне чылай хываççĕ.

Çавăн пекех стипендиатсен йышĕнче пирĕн маттур ентешсем татах пур. Вĕсемпе те эпир мухтанма тивĕç. Вăл шутра - Чăваш кĕнеке издательствинче тимлекен Пăртас хĕрĕ Ольга Иванова ?Австрийская%, «Хыпар» издательство çурчĕн фотокорреспонденчĕ, Хурăнсур Çармăс каччи Василий Кузьмин, Вăрнарти 1-мĕш шкултан вĕренсе тухнă хастар хĕр Танзиля Замалиева.

Пурне те чĕререн саламлатпăр! Маттур çамрăксем - пирĕн пуласлăх.

Светлана ЧИКМЯКОВА