Эрне вĕçĕнче «ZOV Вурнары» волонтер ушкăнĕ пулăшнипе фронта тата икĕ автомобиль ăсатрĕç. «Нива» машинăна Вăрнар чиркĕвĕн прихучĕ пулăшнипе туяннă. Тĕне ĕненекенсем пĕтĕмпе 250 пин тенкĕ пуçтарнă. Çак суммăран 200 пин тенки техника туянма кайнă.

«Нивăпа» Мăн Явăш каччине Григорий Кошкина тивĕçтернĕ. Хушма 120 пин тенке машина валли унпа пĕрле службăра тăракансем пуçтарнă.

Григорий ятарлă çар операцине 2022 çулта тулли мар мобилизаци йĕркипе лекнĕ. Йышăну тухнă вăхăтра вăл Мускавра ĕçленĕ, çавăнпа ăна унтанах çара илнĕ. Тивĕçрен юлма май та пулнă унăн, анчах та каччă урăхла утăм тума пултарайман - çĕршыв ирĕклĕхне сыхлама чĕре ыйтнипе тăнă.

Килте ăна мăшăрĕ, ачисем кĕтеççĕ. Çавăнпа та Григорий тăшман путланасса шанать. «Çĕнтерÿ пурпĕр пирĕн алăра пулать!» - терĕ вăл çирĕппĕн. Салтак служба вырăнĕнче мирлĕ халăха пулăшнине, вĕсене тепĕр чух апат-çимĕçпе тивĕçтернине каларĕ.

Тепĕр автомашинăна –УАЗ-а – Кĕçĕн Кипекри Сергей Сергеев валли уй условийĕсенче çÿреме вăйлăлатнă. Сăрлас, шиномонтаж ĕçĕсене Калининăри Николай Бизиковăн «Лидер», техника юсавне Вăрнарти Владимир Егоровăн «СТО Гараж» автомастерскойĕсенче пурнăçланă.

«ZOV Вурнары» ушкăн ертÿçи Артур Михайлов автотехцентр пуçлăхĕсене, çавăн пекех вĕсенче тимлекен мастерсене Андрей Орлова, Дмитрий Тракова тата Виталий Белова ?АТЦ ЛИДЕР%, Артем Белкова тата Сергей Овчинникова ?СТО ГАРАЖ% тав сăмахĕ калать.

Çавăн пекех Вăрнар чиркĕвĕ панă 50 пин тенкĕпе хăватлă резинăсем туяннă.

Автомобильсене çула тухиччен иккĕшне те Вăрнар храмĕн настоятелĕ Александр Панзин çветтуй шывпа сирпĕтрĕ, инкексенчен сыхланма, Турă хÿттинче çÿреме кĕлĕ вуларĕ, кабинăна турăш çирĕплетрĕ.

Каламалла, служба вырăнне салтаксем отпускран иккĕшĕ те автомобиль рулĕ умĕнче таврăнĕç.

«ZOV Вурнары» ушкăн салтаксем урлă ентешсем валли гуманитари пулăшăвĕ те ăсатрĕ. Вăл шутра - маскировка сеткисем, окоп çуртисем, нуски-труççисем, апат-çимĕç, пурнăç браслечĕсем тата ытти те.

Фронтпа тыл пĕрле чухне çĕнтерÿ пулатех!

Светлана ЧИКМЯКОВА