Шупашкарта Раççей тата Чăваш пичечĕн кунĕсем ячĕпе савăнăçлă мероприяти иртрĕ. Унта Вăрнар район хаçачĕн ĕçченĕсем те хутшăнчĕç

Официаллă пай пуçланиччен ытти массăллă информаци хатĕрĕсенчи ĕçтешсемпе, журналистикăна пĕр вăхăтра вĕреннисемпе, преподавательсемпе калаçма май пулчĕ. Вăрнарсем те, ку тытăмра тимлекенсем, - Хурăн Кăкшăмри Владимир Тимофеев, Кĕçĕн Кипекри Валентина Багадерова, Хурăнсур Çармăсри Василий Кузьмин, Малтикас Ялтăрари Вероника Павлова - уява хутшăнчĕç.

Çакă та кăмăла çĕклерĕ. Фойере уява килекенсене пичет тытăмĕн аталанăвне сăнлакан курав кĕтсе илчĕ. Сăнÿкерчĕксенче вăрнарсем те пурри савăнтарчĕ.

Республикăри массăллă информаци хатĕрĕсен ĕçченĕсене Раççей Патшалăх Думин депутачĕ Анатолий Аксаков, ЧР Министрсен Кабинечĕн Председателĕн заместителĕ - экономика аталанăвĕн тата пурлăх хутшăнăвĕсен министрĕ Дмитрий Краснов, ЧР цифра аталанăвĕпе информаци политикин тата массăллă коммуникацисен министрĕ Михаил Степанов тата ыттисем саламларĕç.

Яваплă çынсем массăллă информаци хатĕрĕсен представителĕсен ĕç-хĕлне пысăк хак пачĕç. «Журналистсен сăмахĕ çулран-çул çивĕчрех те çивĕчрех, ăс-хакăл мулĕ пысăкрах, вĕсен ретĕнче çамрăксем те курăнаççĕ. Вĕсем халăхри шухăша йĕркелеççĕ, çивĕч ыйтусемпе сĕнÿсене влаç патне çитерсе вырăнлă йышăнусем тума пулăшаççĕ», - палăртрĕç сумлă хăнасем. Чăваш пичечĕн отраслĕ паян çĕнйĕркелÿ тапхăрĕнче аталаннине каларĕç. Тытăм ÿсĕмне тÿпе хывакан кашни журналиста, полиграфиста, калăплавçа, редактора тав турĕç, тĕрлĕ наградăсемпе чысларĕç.

Палăртма кăмăллă. Пирĕн маттур ĕçтеш - «Çĕнтерÿ çулĕ» хаçатăн дизайнерĕ Инга Свечкина Чăваш Республикин Патшалăх Канашĕн Хисеп грамотине тивĕçрĕ. Сумлă хута вăл Виктор Горбунов депутатăн аллинчен илчĕ.

Инга Валерьевна редакцире 20 çул ытла тăрăшать. Хаçат калăплас ĕçе пурнăçланипе пĕрлех профсоюз ĕçне йĕркелесе пырать.

Сăмах май, уявра ентеш-журналистсем Вероника Павловапа Василий Кузьмин та наградăсене тивĕçрĕç.

Массăллă информаци хатĕрĕсен ĕçченĕсене «Глянец» ушкăн, Алексей Московский юрăç та саламларĕç.

Светлана ЧИКМЯКОВА