Унчченхи вырсарникун пысăк спорт событийĕпе паллă пулса юлчĕ. Вăрнарти «Рассвет» спорт шкулĕнче волейбол вăййин тусĕсем тĕл пулчĕç. Турнира йĕркелекенĕсем - запасри пограничниксен «Щит Родины» обществăлла организацийĕн хастарĕсем.

Вĕсем ку пĕрлешĕвĕн пуçаруçине, малтанхи ертÿçине - Раççей тата Чăваш Республикин культура тава тивĕçлĕ ĕçченне Владимир Антонович Михайлова - хисеп турĕç. Шăпах ун ячĕпе, унăн çуралнă кунĕ тĕлне иртрĕ те ĕнтĕ ăмăрту.

Турнир, чăн та, хĕрÿ тупăшăва çаврăнчĕ. Командăсем ултă округран килсе çитнĕ. Кашниех мала тухассишĕн вăйăсенче çивĕч кĕрешрĕ. Апла пулин те пĕтĕмĕшле пухнă очкосемпе пĕрремĕш вырăна Шупашкар команди тухрĕ. Вĕсенчен кăшт кăна кая юлса иккĕмĕш вырăна вăрнарсем çĕнсе илчĕç. Виççĕмĕшсем вара - Комсомольски пограничникĕсем.

Тĕрĕссипе, турнира йĕркелекенсем пуриншĕн кирлĕ те пĕлтерĕшлĕ ĕç туса ирттернине палăртмалла. Вĕсем тĕрлĕ ăрури çынсене пĕрлештерчĕç, хăйсен тĕслĕхĕпе туслăх, пĕрлĕх, çирĕплĕх мĕнне кăтартрĕç. Паян ансат мар вăхăт. Юнашарах вăрçă-харçă, курайманлăх, хирĕçÿсем... Ветеран-пограничниксем хальхи вăхăтра пирĕн çĕршыв интересĕсене хÿтĕлекенсене май килнĕ таран пулăшма яланах хатĕр. Хăйсен вăйĕпе вĕсем фронта тĕрлĕ тĕслĕ пулăшу ăсатрĕç. Çав вăхăтрах запасри пограничниксем çамрăксене тĕрĕс воспитани парассине те активлă хутшăнаççĕ. Вĕсене Тăван çĕршыва юратма, патриотлăх туйăмĕпе хавхаланса ÿсме вĕрентеççĕ.

Владимир Михайлов районти пограничниксен обществăлла пĕрлешĕвĕн ĕçне 1998 çултан хастар йĕркелесе пынă, хăй тавралла маттур та хастар юлташĕсене пуçтарнă. 2018 çултанпа вара, Владимир Антонович вăхăтсăр пурнăçран уйрăлнă хыççăн, унăн ĕçне малалла Иван Георгиевич Яковлев тивĕçлĕ тăсрĕ. Вăл та ăста ертÿçĕ, запасри пограничниксен туслă, шанчăклă коллективне йĕркелерĕ. Ку йыш паян округăн обществăлла пурнăçĕнче чи маттуррисенчен пĕри.

Эпир, Владимир Антонович Михайловăн тăванĕсем, «Щит Родины» обществăлла организаци хастарĕсене пирĕн çывăх çыннăмăра манманшăн, ăна асра тытса хисепленĕшĕн, шанчăклăхшăн, çынлăхшăн чунтан тав тăватпăр.

Михайловсен çемйи