Шкул мăнаçлăхĕ, отличник, округ, республика, Пĕтĕм Раççей шайĕнчи предмет олимпиадисен нумай хут призерĕпе çĕнтерÿçи. Активист, ырă кăмăллă, сăпайлă вĕренекен, шанчăклă тус-юлташ...Тата нумай ырă сăмахсемпе хаклаççĕ Вăрнарти 2-мĕш шкулта 10-мĕш класра вĕренекен Дмитрий Фирсова учительсемпе тантăшĕсем.

Чăннипех те маттур та пултаруллă çамрăкăн вĕренÿри çитĕнĕвĕсен пуххи курăмлă. Пуçламăш шкул саккинченех вăл «5» паллăпа кăна ĕлкĕрсе пырать. Яваплăха туйса кашни урока тĕплĕн хатĕрленет. Пур предмета та кăмăлланине, анчах математика, физика, информатика предмечĕсем ытларах килĕшнине палăртать арçын ача.

Пĕлтĕр республика Пуçлăхĕн стипендиачĕн ятне тивĕçнĕ. Çулсерен тĕрлĕ олимпиадăсемпе конкурссене активлă хутшăнать.

Иртнĕ вĕренÿ çулĕнче Дмитрий республика шайĕнче астрономи предмечĕпе çĕнтерÿçĕ, обществознанипе призер пулнăччĕ.

Кăçал вара тата пысăкрах çитĕнÿсемпе палăрнă вăл: харăсах тăватă предметпа - математикăпа, информатикăпа, астрономипе тата обществознанипе регионти олимпиадăсен çĕнтерÿçи тата призерĕ. Муниципаллă тапхăрта ултă предметпа пĕрремĕшсен ретĕнче пулнă.

Вĕрентекенсем палăртнă тăрăх, ку тĕлĕнмелле пысăк результат. Вăл, паллах, тар тăкса вăй хумасăр, тĕплĕн хатĕрленмесĕр пулмасть. Дмитрий хушма литература вулама юратать, çĕнĕ пĕлÿ илсе хăйне хăй аталантарассине пысăк тимлĕх уйăрать. Çавăнпа пĕрлех наставниксен пулăшăвне, вĕсем тарăн пĕлÿ парса тĕрĕс çул кăтартса пынине те палăртса хăвармалла. Вĕсем - Юрий Александрович Феофанов ?математика, астрономи%, Людмила Ивановна Орлова ?информатика% тата Наталия Николаевна Сергеева ?обществознани%.

Дмитрий нумай ачаллă çемьере çитĕнет. Ывăлĕн ÿсĕм-çитĕнĕвĕсем чи малтанах ашшĕ-амăшĕн - Алексей Николаевичпа Марина Вячеславовнан - тивĕçĕ. Вĕсем ачисемшĕн яланах ырă тĕслĕх вырăнĕнче. Çемьери тĕрĕс воспитание пула Дмитрий ыркăмăллăхпа, тăрăшулăхпа, тус-юлташĕсене яланах пулăшма хатĕррипе, пур ĕçе те тĕплĕн пурнăçланипе палăрса тăрать. Тантăшĕсем хушшинче - лидерсен йышĕнче. Ăна класс старостин тивĕçĕсене шанса панă. Пушă вăхăтра шкулти тата округри кружоксене çÿрет, тавракурăмне ÿстерет, Ача-пăча пултарулăх çурчĕ çумĕнчи IT-куб воспитанникĕ.

Дмитрий малашнехи çул-йĕре инженер профессийĕпе çыхăнтарма шутланине пĕлтерчĕ. Вăл пысăк квалификациллĕ специалист пуласси иккĕлентермест. Эпир ăна хастарлăха чакармасăр малалла та çĕнĕрен те çĕнĕ çитĕнÿсем тума, экзаменсене ăнăçлă тытма çирĕп сывлăх,иксĕлми вăй-хал сунатпăр.

Оксана СЕМЕНОВА