Çĕнĕ çулăн пĕрремĕш уйăхĕ иртсе кайрĕ. Çынсен куçăмĕ, ача çураласлăхĕ, мăшăрлану-уйрăлу тĕлĕшĕнчен мĕнле пулнă вăл округшăн - тĕп цифрăсене ЗАГС пайĕ пĕтĕмлетет:
Округри ЗАГС пайĕнче пĕтĕмпе 69 гражданла тăрăм актне регистрациленĕ.
Январь уйăхĕнче поселокра тата ялсенче пĕтĕмĕшле тăхăр пепке çут тĕнчене килнĕ: ултă арçын ача тата виçĕ хĕрача. Çав шутран ачасем çурални çинчен пилĕк записе Патшалăх тивĕçтерĕвĕсен пĕрлехи порталĕ урлă янă заявленисем тăрăх хатĕрленĕ.
Иртнĕ уйăхра çавăн пекех икĕ ача тĕлĕшпе ашшĕлĕхне палăртнă.
Ача çураласлăхĕпе танлаштарсан, çынсем пурнăçран уйрăлнин хисепĕ питĕ нумай. Çулталăкăн пĕрремĕш уйăхĕнче арçынсем те, хĕрарăмсем те пĕрешкел - 25-шер - вилнĕ. Арçынсен вăтам пурнăç тăсăмĕ 57 çулпа кăна танлашнă пулсан, хĕрарăмсен - 72 çулпа.
Январьте округри икĕ мăшăр çĕнĕ çемье çавăрнă. Çав вăхăтрах пиллĕкĕшĕ уйрăлнă: тăваттăшĕ - суд йышăнăвĕпе, пĕри - килĕшсе татăлса.
Иртнĕ уйăхра унчченхи актсенчи записьсене тÿрлетÿсем кĕртме ыйтнипе ултă заявление пăхса тухнă. Граждансен заявленийĕпе çав кунах 36 хушма свидетельство тата 29 справка хатĕрлесе панă. Уполномоченнăй органсем ыйтнипе гражданла тăрăм акчĕсен 48 записĕ тĕлĕшпе сведенисем тăратнă. Çавăн пекех 115 записе улшăнусем кĕртнĕ.
Январьте ЗАГС пайĕ федераллă бюджета 68100 тенкĕ патшалăх пошлинине хывнă.
Апрель 2025 |