Çулталăкăн тĕп пулăмĕ – Тăван çĕршывăн Аслă вăрçи Çĕнтерÿпе вĕçленнĕренпе 80 çул çитни. Раççей Президенчĕ 2025 çула Тăван çĕршыв хÿтĕлевçин çулталăкĕ тесе пĕлтернĕ. Республикăра эпир çулталăка Çĕнтерÿпе патриотлăха халалларăмăр. Тăван çĕршыва хÿтĕлесси пирĕншĕн патриотла хавхалану кăна мар. Вăл пире шухăшпа та, ĕçпе те пĕрлешсе малалла талпăнма хистекен ăнтăлу. Хальхи вăхăтпа иртнине çыхăнтарса ирттерекен мĕнпур мероприятие çулталăк темипе пĕр килекен содержанипе йĕркелесе ирттерни питех те пĕлтерĕшлĕ тесе шутлатăп.

Пĕтĕм ветерана – Тăван çĕршывăн Аслă вăрçин участникĕсене, блокадăри Ленинградра пурăннисене, концлагерьсенче асапланнă ачасене, тыл ĕçченĕсене, «вăрçă ачисене» – пурне те тивĕçлĕ тимлĕх уйăрмалла. Эпир вĕсене мирлĕ тÿпешĕн, çĕршывра пурăнма тата ăна аталантарма майсем пурришĕн, çапăçу хирĕнче те, ĕç фронтĕнче те кăтартнă хăюлăхпа паттăрлăхшăн тав тума пăрахмастпăр.

Президент асăннă категорири граждансене пĕр хутчен тивĕçекен укçа тÿлевĕ пама йышăннă. Тăван çĕршывăн Аслă вăрçин инваличĕсене, блокадăри Ленинградра пурăннисене, концлагерьсенче асапланнă çул çитмен çынсене, Тăван çĕршывăн Аслă вăрçинче пуç хунă тата вилнĕ участникĕсен тăлăх арăмĕсене ?упăшкисене% Чăваш Республикин бюджетĕнчен хушма майпа 20 пин тенкĕ тÿлеме, тыл ĕçченĕсем валли тÿлев виçине 5 пин тенкĕ чухлĕ палăртма сĕнетĕп.

Чăваш ен – «вăрçă ачисем» категорие çирĕплетнĕ регионсенчен пĕри, çав йыша 40 пине яхăн çын кĕрет. Эпир вĕсене укçа-тенкĕпе те, урăхла майсемпе те тăтăшах пулăшса тăма калаçса татăлтăмăр. Маларах Чăваш ен Правительстви «вăрçă ачисене» 2 пиншер тенкĕ тÿлесси çинчен йышăну тунăччĕ. «Вăрçă ачисене» пĕр хутчен паракан тÿлеве 5 пин тенкĕ таран ÿстерме сĕнетĕп.

Республикăра пурăнакансене пулăшу памалли мелсен шутĕнче – çапăçусен инваличĕсене уйăхсерен паракан тÿлев. Ăна илсе тăракансем – Тăван çĕршыва хÿтĕлессипе çыхăннă сăваплă тивĕçе тĕрлĕ вăхăтра, тĕрлĕ çĕрте пурнăçланă çынсем. Вĕсен йышĕнче ятарлă çар операцине хутшăннисем те чылаййăн. Çапăçусен инваличĕсене пĕр хутчен паракан тÿлев виçине икĕ хут пысăклатма сĕнетĕп.

Пирĕн медиксем ветерансене, ятарлă çар операцине хутшăнакансене тата вĕсен çемйисене пулăшса тăрас ĕçе хастар хутшăннине палăртмалла. Иртнĕ çул 1 пин ытла çын реабилитаци витĕр тухнă, çав шутра 300 яхăнăшĕ стационарта.

Кăçалтан пуçласа – Тăван çĕршыв хÿтĕлевçин çулĕнче тата Тăван çĕршывăн Аслă вăрçи Çĕнтерÿпе вĕçленнĕренпе 80 çул çитекен çулта – сывлăх сыхлавĕнче çĕнĕ проекта хута яратпăр. Унăн тĕллевĕ – Тăван çĕршывăн Аслă вăрçин ветеранĕсене тата ятарлă çар операцине хутшăнакансене медицина енĕпе пулăшса тăрасси. Вĕсем валли пайăр медицина тĕрĕслевĕсем, çав шутра килте те, йĕркелесе ирттерĕç, сиплев тата реабилитаци ĕçĕсен программине туса хатĕрлĕç. Проект Чăваш ен Общество палатипе тата Чăваш енри Хĕрарăмсен союзĕпе пĕрле пурнăçланать.