«Пĕтĕм тĕнчери коопераци тата экспорт» нацпроекта пула 2019 çултан пуçласа 2024 çулччен Чăваш ен агропром продукцине 160 пин тонна чикĕ леш енне ăсатнă.

Малтанхи пилĕкçуллăхпа танлаштарсан, санкцие, эмбаргăна пăхмасăр, ку тапхăрти продукци калăпăшĕ 2,2 хут пысăкрах.

Ют çĕршывра уйрăмах кăмăллакан чăваш агротаварĕсем - кондитер изделийĕсемпе кайăк-кĕшĕк ашĕ. Пуринчен ытла Чăваш енри продукцие Китай, Беларусь тата Казахстан туяннă.

Кăсăклă пулăм: кăçал Китайра пурăнакансем Чăваш енре туса илнĕ качака сĕтне ĕçме пуçлĕç. Паха продукцие Шупашкар тăрăхĕнчи «Деревенский дворик» кооператив чикĕ леш енне ăсатĕ. Çак хуçалăх качака сĕтне Раççейри 27 региона сутать.

Елена ГРИГОРЬЕВА