Вăрнарти хутăш препаратсен завочĕ Донецк хулине гуманитари пулăшăвĕн тата тепĕр пысăк партине ăсатрĕ. Хальхинче те - икĕ фура апат-çимĕç.

«Август» компанин укçи-тенкипе Вăрнарти филиал 2 тонна типĕтнĕ сĕт, 14 пин банка аш-какай тушенки, 635 кг çурматĕтĕмленĕ кăлпасси, 5 пин банка пулă консерви, 2-шер пин банка сгущенка, типçу, пакетланă сыр, печени, канфет, сахăр-рафинад, чей, хăвăрт пиçекен пăтăсем, кофе тата ытти продукта ăсатнă.

Ятарлă çар операцийĕ тытăннăранпа Вăрнарти хутăш препаратсен завочĕ гуманитари грузне 34 фура ăсатнă, пĕтĕмпе 95 миллион тенкĕлĕх. Вăл шутран 26 фури - фронт линийĕн çывăхĕнче пурăнакансем валли апат-çимĕç наборĕсем. «Август» компани унти «Быть добру» ыркăмăллăх фончĕпе тачă çыхăнусем йĕркеленĕ. Фондăн волонтерĕсем предприятин автомобилĕсене Донецк хулинче кĕтсе илеççĕ, пушатаççĕ, регионти пулăшу кирлĕ çынсене çитерсе параççĕ.

Апат-çимĕç продукчĕсене комплектлассипе завод ĕçченĕсем кашнинчех чунтан тăрăшаççĕ. Производство хăвачĕ ÿснипе хальхи вăхăтра цехсем чарăнмасăр, талăкĕпе ĕçлеççĕ. Çамрăк ĕçтешĕсен вăхăчĕ сахаллине кура гуманитари пулăшăвне хатĕрлеме хальхинче ветерансем чылай пулăшрĕç. Вĕсем çамрăксемпе тан кунĕпе ĕçлерĕç.

Каламалла, предприятирен тивĕçлĕ канăва тухнисем кашни кун РДК-на маскировка сеткисем çыхма çÿреççĕ. Материалĕпе вĕсене Вăрнарти хутăш препаратсен завочĕ тивĕçтерет.

Людмила ИВАНОВА