Ĕçлекенсене вăрттăн схемăсемпе тÿлени тата ĕç хутшăнăвĕсене официаллă йĕркелеменни - республикăра чи çивĕч проблемăсен шутĕнче. Чăн тÿлевсене пытарни, çавна май бюджета налуксем пырса кĕменни, ытти хывăмсене куçарманни республика экономикине пысăк тăкак кÿрет.

Унсăр пуçне, ĕçлекенсем те шар кураççĕ: шалăвăн чăн виçине кăтартманран вĕсен чирлесен паракан пособийĕсем, декрет тата ытти тÿлевĕсем пĕчĕк. Çакă кайран пенси йĕркеленĕвне те витĕм кÿрет: официаллă ĕç укçи сахал пирки пенси виçи те пысăк мар.

Ку лару-тăрăва тĕпрен улăштармалла, çирĕп мерăсене тăхтаса тăмасăр йышăнмалла - тĕллев лартнă республикăра. Çакăн пирки Чăваш ен Ĕç министерстви нумаях пулмасть муниципаллă округсен яваплă специалисчĕсемпе те сÿтсе явнă. Çĕршыв, республика аталанăвне сиенлекен саккунсăр ĕçлеве хирĕç тăрассине округсенче те вăйлатмаллине палăртнă.

Канашлăва хутшăннисем ĕç хутшăнăвĕсене мĕнле йĕркеленине тĕрĕслесе тăрас тĕлĕшпе те, шалăва «конвертпа» тÿлессине чарассипе те çĕнĕ механизмсемпе усă курмаллине каланă. Саккунсăр ĕç-хĕле тупса палăртасси, каламалла, вырăнти хăйтытăмлăх органĕсемпе, Патшалăх ĕç инспекцийĕпе, прокуратурăпа, налук органĕсемпе, Социаллă фондпа пĕрле пурнăçланать.

Пĕлтĕр, акă, ятарлă 474 лару ирттернĕ, вĕсенче йĕркене пăснă 3172 организаци-предприяти ертÿçисене, предпринимательсене чĕнсе итленĕ. Витĕмлĕ тĕрĕслев лайăх «тухăç» панă. Çакăн хыççăн, Налук службин малтанхи кăтартăвĕсем тăрăх, уйрăм çынсен тупăшĕ çине хуракан налуксем пĕлтĕрхи 9 уйăхра хушма хывăмпа тепĕр14,9 млн тенкĕ пырса кĕнĕ.

Ирина ПЕТРОВА