«Апат-çимĕç» хăрушсăрлăхĕн технологи тивĕçтерĕвĕ» наци проекчĕпе килĕшÿллĕн «АПК-ри кадрсем» федераци проекчĕ ĕçлеме пуçларĕ. Çавна май Чăваш енре çичĕ агрокласа оборудованипе пуянлатĕç.

- Ял хуçалăх таварне туса илекенсене пула икĕ çулта республикăра 130 çĕнĕ агролаборатори уçнă, «Профессионалитет» федераци программипе Çĕрпÿри ял хуçалăх техникумĕ 100 миллион тенкĕлĕх çĕнелнĕ, - тенĕ вице-премьер Сергей Артамонов.

Çĕнĕ оборудование Вăрнарти 2-мĕш шкула та вырнаçтарма палăртаççĕ. Аграри кадрĕсем çитĕнтерме шкул саккинченех тăрăшни пĕлтерĕшлĕ. «Август» Фирма проекта хутшăнса софинансировани йĕркипе укçа-тенкĕ уйăрĕ. Çавăн пекех Патăрьел, Красноармейски, Çĕрпÿ, Муркаш, Шупашкар округĕсенчи, Етĕрне хулинчи шкулсенче агроклассем те пуянланмалла. Вырăнти предприятисем те пулăшу аллине тăсĕç.

Модернизаци проектне пурĕ 200 ытла вĕренекен хутшăнĕ.

Елена ГРИГОРЬЕВА