Массăллă чупăва хутшăнакансенчен чылайăшĕ çапла пĕлтерчĕ

Туçи Çармăсри Волковсем, ак, старта çемйипех тухаççĕ. Кăçал та Сергей Калистратовичпа Татьяна Геннадьевна тата вĕсен ывăлĕсем йĕлтĕрсем çине хаваспах тăчĕç. «Трасса питĕ аван. Çанталăкĕ те хитре. Ярăнни кăмăла питĕ çĕклерĕ»,- пĕлтерчĕ Сергей Волков дистанцие тухсан.

«Раççей йĕлтĕр йĕрĕ» çулсеренех тĕрлĕ ÿсĕмри çынсене пĕрлештерет. Влаç представителĕсем, предприяти-организацисен ертÿçисемпе ĕçченĕсем, шкул-ача сачĕсен коллективĕсем... Ветерансем яланах хастар. Уйрăмах - шкул ачисем, вĕсем хальхинче те чи йышлисем пулчĕç.

Кăçалхи чупăва Аслă Çĕнтерĕвĕн 80 çулхи юбилейне халалларĕç. Йĕлтĕр тусĕсене саламланă май, Чăваш енри тарифсемпе ĕçлекен патшалăх службин ертÿçи Сергей Егоров, округ пуçлăхĕ Надежда Никандрова, Владимир Яковлев депутат яланах çĕнтерÿсем патне туртăнма, спорт ку енĕпе пысăк пулăшу панине каларĕç.

Вăрнар тăрăхĕнче пурăнакансем ГТО комплексне пурнăçлассине те хастар хутшăнаççĕ. Массăллă чупу старт иличчен Çĕрпел шкулĕн учительне Неля Игнатьевана тата Санарпуç шкулĕн директорне Владимир Малова ГТО-н Палăрту паллипе чысларĕç.

Чи хĕрÿ самантсем йĕлтĕр трассинче пулчĕç. Ÿсĕме кура пухăннисем 1 тата 2 км чупрĕç. Хăшĕсем темиçе ушкăнра та тупăшрĕç.

Йĕлтĕр спорчĕ сывлăхшăн усăллă. Вăрнарти хутăш препаратсен завочĕн ĕçченĕсем ку енĕпе хастар, вĕсене час-часах вăрманти трассăсем çинче курма тÿр килет. Вырсарникун, ак, химиксем сывлăх кунне йĕркеленĕ - ушкăнпа ярăнма тухнă.

Ялсенче те массăллă чупусем иртнĕ. Çĕрпелсем, хирпуçсем, уравăшсем те йĕлтĕрсем сырса ялсен çывăхĕнчи трассăра ярăннă.

Пурте маттурсем!

Светлана ЧИКМЯКОВА