Иртнĕ çул пире пурне те хавхалантаракан питĕ пĕлтерĕшлĕ пулăмпа вĕçленчĕ. Ку вăл – ятарлă çар операцийĕн тĕллевĕсене пурнăçлас ĕçри татăклă улшăну. Пирĕн аттесемпе пиччесем, аннесемпе аппасем, ывăлсемпе хĕрсем чăн вырăс территорийĕсене ирĕке кăларса вăрçă хирĕнче ăнăçăва йĕркеллĕн малалла аталантараççĕ. Пирĕнтен кашниех хăйĕн ĕçĕсемпе, ĕç вырăнĕнчи тивĕçĕсене пысăк ăсталăхпа пурнăçласа пырса, пирĕн салтаксене мĕн кирлипе туллин тивĕçтерсе тăма пулăшса Тăван çĕршыва хÿтĕлессипе çыхăннă сăваплă ĕçе хутшăнать. Ку ĕçе эпир ÇĔНТЕРĔВЕ кĕтсе иличченех пурнăçласа пырăпăр.

Пирĕн пин-пин ентеш Раççейри мĕнпур халăх çыннипе çума-çумăн тăрса шăпах çак самантра çапăçу хирĕн тĕрлĕ лаптăкĕнче алла хĕçпăшал тытса çапăçать. Тăван çĕршыва хÿтĕлесе вĕсенчен хăшĕ-пĕри, шел пулин те, пуç хунă та ĕнтĕ.

Эпир кашнинех асра тытăпăр. Астăвăм тивĕçлипе упрантăр, вĕсен паттăрлăхĕ вара, геройсен паттăрлăхĕ çитĕнекен ăрушăн гражданла тивĕçе парăннине тата Тăван çĕршыва юратнине кăтартакан ырă тĕслĕх пултăр тесе мĕн кирлине пурне те тăвăпăр.

Эпир ятарлă çар операцине хутшăнакансене те, вĕсен çемйинчи çынсене те пулăшу памалли майсене туллин пурнăçа кĕртрĕмĕр. Контракт тунă вырăна пăхмасăр, Тăван çĕршыв хÿтĕлевçисен пĕтĕм категорийĕ тата вĕсен çемйинчи çынсем пулăшу илеççĕ.

Пулăшу нихăçан та ытлашши пулманнине асра тытмалла. Ашшĕ е амăшĕ вăрçă хирĕнче пуç хунă ачасене уйрăмах пулăшма тăрăшмалла. Пирĕн тивĕç – çакăн пек çемьесене ачасем хăйсем тĕллĕн пурăнма тытăничченех пур енлĕн пулăшса тăрасси.