Нарăс уйăхĕн 7-мĕшĕнче К.В.Иванов ячĕллĕ литература музейĕнче «Чăваш поэзийĕн çăлтăрĕ» курав ĕçлеме пуçланă. Ăна чăваш литературин классикĕ, «Нарспи» поэма авторĕ çуралнăранпа 135 çул çитнине халалланă.

Куракансем Константин Иванов поэтăн тĕрлĕ енлĕ пултарулăхĕпе паллашма пултараççĕ. Вăл этнограф та, чĕлхеçĕ те, литератор та, куçаруçă та, педагог та, ÿнерçĕ те, музыкант та, инженер та.

Куравра Константин Ивановăн ĕçĕсемсĕр пуçне Шупашкарти ÿнер училищинче тата И.Я. Яковлев ячĕллĕ педагогика университетĕнче вĕренекенсен, Чăваш ен художникĕсен, çав шутра Петр Сизов тата Анатолий Миттов «Нарспи» поэма тăрăх сăнарланă ÿкерчĕкĕсемпе паллашма пулать.

Унсăр пуçне тĕрлĕ чĕлхесемпе пичетленсе тухнă «Нарспи» поэмăн кăларăмĕсене те курма май пур.