Тăван çĕршывăн Аслă вăрçин пулăмĕсен сÿнми астăвăмĕ, çĕнтерÿçĕ-ăрăвăн паттăрлăхĕ тата паянхи хÿтĕлевçĕсен, СВО участникĕсен, героизмне палăртни кăçалхи çулталăкăн символĕ пулса тăчĕ.

Раççейри Çĕршыв хÿтĕлевçин çулне тата Чăваш енри Çĕнтерÿпе патриотизм çулне халалласа кăçал Вăрнар округĕнче те чылай мероприяти ирттерме палăртнă. Эрнекун вара ăна чаплă лару-тăрура уçрĕç.

Округ пуçлăхĕ Надежда Никандрова, «Офицеры России» обществăлла организацин регионти уйрăмĕн исполкомĕн ертÿçи, республикăри Обществăлла палата членĕ Станислав Афанасьев Тăван çĕршыв ирĕклĕхне сыхласа хăварассишĕн пирĕн ентешсем те çав тери сумлă тÿпе хывнине палăртрĕç. Вăл шутра - пурнăçĕсене парса та. Ятарлă çар операцийĕнче те Вăрнар тăрăхĕн каччисем хăюлăх, иксĕлми паттăрлăх кăтартаççĕ. Вĕсем те - чăн-чăн Геройсем, терĕç тухса калакансем.

Вăрнар Чиркĕвĕн настоятелĕ Александр Панзин протоиерей салтаксен хастарлăхне палăртнипе, гуманитари пулăшăвне кÿнипе пĕрлех ĕненÿ пирки те манмалла маррине асилтерчĕ. Чиркÿре, сăмахран, кашни эрнере ятарлă кĕлĕ вулаççĕ. Пачăшкă салтаксене Турă хÿтлĕхĕнче çÿреме тăтăшах кĕлĕ вуламаллине каларĕ.

Уяври чи хаклă хăнасен йышĕнче пирĕн ветерансем те пулчĕç: Хирпуçĕнче тата Юпшик Ялтăрара пурăнакан тыл ĕçченĕсем Иван Мироновпа Дина Никифорова тата Малти Кăкшăмри тăлăх салтак арăмĕ Ульяна Никифорова. Округ пуçлăхĕ Надежда Никандрова вĕсен кăкăрĕсем çине Аслă Çĕнтерÿ тунăранпа 80 çул çитнĕ ятпа юбилей медальне çакса ячĕ.

Чунсене концерт номерĕсем хăпартлантарчĕç. Кашни номерĕ патриотизмпа, тăван çĕре, çĕршыва юратнипе çыхăнчĕ. Районти культура çурчĕн, ача-пăча ÿнер шкулĕн, «Химик» спорт клубĕн воспитанникĕсем, «Тивлет», «САЛАМ» ансамбльсем, ветерансен халăх хорĕ, Алина Евдокимова, Александр Васильев, Дмитрий Иванов, Анастасия Крючкова солистсем чăн-чăн уяв парнелерĕç.

Светлана ЧИКМЯКОВА