Пулă тата унран хатĕрленĕ продукципе апатра усă курассине Федераци канашĕн комитет ларăвĕнче пăхса тухнă. Онлайн-формат шайĕнче ирттернĕ уçă калаçăва Чăваш ен Ял хуçалăх министерствин представителĕсем те хутшăннă.

Регионсем умне тĕллев лартнă - çулталăкра кашни çын пуçне пулă çиессине 28 килограма çитермелле.

Вице-премьер Сергей Артамонов çирĕплетнĕ тăрăх, республикăра пурăнакан вăтамран çулталăкра 19,8 кг пулă çиет. 2025 çулхи тĕллев - ку кăтартăва 7 процент ÿстермелле.

Чăваш ен - пулă промыслин регионĕ мар. Апла пулин те республикăра пулă çитĕнтерекен, ăна тĕтĕмлекен, тĕрлĕ консервăсем хатĕрлекен 12 организаци пур. Чĕртавара республика тулашĕнчен 1, 2 тонна ытла кÿрсе килеççĕ.

Аквакультурăна аталантарас тĕллевлисем валли Чăваш енре «Перспектива» грант пур, субсидие 12 фермер 80 млн тенкĕлĕх илнĕ. Унсăр пуçне çемье фермисене уçакансене патшалăх пулăшăвĕпе тивĕçтереççĕ, «Агростартап» грант та курăмлă тĕрев. Пулла тирпейлемелли оборудовани туяннăшăн тăкакăн 30 процентне саплаштараççĕ.

Çавăн пекех халăхра пулă çиессине ÿстерес енĕпе Çул карттине хатĕрленĕ. Унпа килĕшÿллĕн пулă отрасльне аталантаракансем аграри мероприятийĕсене хутшăнаççĕ.

Калас пулать, Раççейре чи нумай пулă Магадан тата Астрахань облаçĕсенче, Ненец автономи округĕнче пурăнакансем çиеççĕ. Ку продукт кашни çын пуçне 40 килограмран ытла тивĕçет. Чăваш ен рейтингра 57-мĕш вырăнта.

Пулă питĕ усăллă продукт, витаминсемпе минералсемпе пуян, организмри веществосен ылмашăвне лайăхлатать. Диетологсен сĕнĕвĕпе пулă пирĕн апат рационĕнче эрнере икĕ хутчен кая мар пулмалла. Кальципе фосфор виçи çак продукцире курагапа иçĕмринчен 40 процент ытларах. Паллă ĕнтĕ, пулăра Омега-3 текен çу кислоти те пур. Вăл чĕрепе юн çаврăнăшĕн ĕçне йĕркелесе тăма пулăшать. Холестерин шайне чакарать. Специалистсен шухăшĕпе организм Омега-3 йÿçеке кирлĕ чухлĕ илсе тăрсан инфаркт çапасси темиçе хут чакать.

Пĕрисем тинĕс пуллине, теприсем юханшывра, пĕвере ишекеннине çиме кăмăллаççĕ. Çапах та çурçĕр тинĕсĕсенчи пулăсем - палтус, нельма, муксун ... усăллăрах теççĕ. Вĕсенче йод та нумай.

Пулă апачĕ пахалăхлă та, анчах хакĕ йÿнĕ мар-çке. Çапах та харпăр хăй сывлăхĕшĕн тăрăшакансем апат рационне пулăпа пуянлатаççĕ.

Елена ПОРФИРЬЕВА