Асăрханулăха çухатсан инкек тухасси инçе мар. Вут-çулăмпа та çавăн пекех: тимсĕрлĕхе вăл каçармасть, хытах шар кăтартма пултарать. Çакна пулах ĕнтĕ хамăр округра та инкексен сводкине тепĕр пушар хушăннă. Эрнекун Çĕньял ялĕнче пурăнмалли çурт çуннă-мĕн.

- Пушар ирхи 10 сехет тĕлнелле алхасма пуçланă. Инкек патне шăпах та кил хуçин асăрханусăрлăхĕ илсе çитерме пултарнă тесе шутлаççĕ. 58-ти арçын сигарет туртса янă та унăн çунса пĕтмен тĕпне пластик витрене пăрахнă. Пушарта пÿлĕмсен шалти отделки çуннă, çуртăн тăрри те сиенленнĕ. Çулăма çăлавçăсен 100 тăваткал метр лаптăкра путлантарма тивнĕ. Пĕтĕмпе ăна сÿнтерме МЧС-ăн икĕ техники хутшăннă, - пĕлтерет МЧС-ăн республикăри Тĕп управленийĕ.

Сигарет туртнă чух асăрханусăр пулнăран инкек сиксе тухни сайра мар. Ку - пушарсен тăтăш сăлтавĕсенчен пĕри. Çавăнпах ĕнтĕ пушар хуралĕн сотрудникĕсем çакна яланах асра тытма сĕнеççĕ. Сыхă пулнине нимĕн те çитмест:

- Вырăн çинче выртса чĕлĕм мăкăрлантарассине йăлана кĕртмелле мар.

- Сигарет тĕпне те ăçта килнĕ унта ывăтма юрамасть, ăна хума пепельницăпа усă курмалла.

- Чĕлĕм сÿннине те тĕрĕслеме манмалла мар. Тĕлкĕшсе выртаканскер, тивсе илекен япаласем çывăхра-тăк, пысăк инкек кăларма пултарать.

Кил-çуртра çулăмпа пур енлĕ асăрханулăх кирлине канмалли кунсенче пулнă тепĕр хăрушла синкер те çирĕплетет. Вăл Улатăр округĕнчи Атрать поселокĕнче тухнă. Кунта пĕр хуçалăхра уйрăм çурт тискер çуннă. Чи хăрушши вара - пушара сÿнтернĕ чух çăлавçăсем иккĕри тата тăваттăри арçын ачасен виллисене тупни. 27-ри хĕрарăмпа 36-ри арçынна медицина пулăшăвĕ пама леçнĕ. Инкек сăлтавне палăртассипе тĕрĕслевсем иртеççĕ.

Асра тытăр: асăрханни нихăçан та ытлашши мар. Усаллинчен вара шанчăклă сыхласа хăварма пултарать. Тимлĕхе ан çухатăр, хăвăршăн та, ыттисемшĕн те хăрушлăх ан кăларăр!

Хамăр инф.