Пурнăçра тем тĕрлĕ пăтăрмах сиксе тухма пултарать. Ак, кĕтмен çĕртен пĕр-пĕр çын патне парăм тÿлемелле тесе хут килет. Документра ячĕ-шывĕ те пĕрешкел, анчах унăн нимле парăм та çук-çке. Мĕн тумалла кун пек чухне/

Енчен те ку пурнăçлав хучĕ Суд приставĕсен службинчен çитнĕ, çыннăн ячĕ-хушамачĕ, ашшĕ ячĕ те чăнах та пĕр килет-тĕк, «Госуслуги» портал урлă ют парăм çинчен пĕлтерсе заявлени ямалла.

- Тĕп услови - порталта уйрăм учет записĕ авторизациленĕ пулмалла. Ун хыççăн «Подача заявлений и ходатайств в ФССП» раздела кĕмелле, «На мне числится чужой долг. Я хочу его оспорить» тенине суйламалла. Çавăн пекех заявленири даннăйсене çирĕплетмелле, пурнăçлав производствин номерне пĕлтермелле, паспортăн копине кĕртмелле тата лару-тăрăва уçăмлатакан ытти факта кăтартмалла. Çакăн хыççăн заявлени хăех йĕркеленсе суд приставĕсем патне каять, - ăнлантарать Суд приставĕсен федераллă службин Чăваш Республикинчи управленийĕ.

Çавăн пекех тепĕр хут аса илтереççĕ: «Госуслуги» портал урлă пурнăçлав производстви пурри, вăл мĕнле пурнăçланни çинчен информацие пĕлме тата парăмсене татма пулать. Унсăр пуçне суд йышăнăвне пурнăçлас пирки заявлени, ходатайство, ăнлантару, хирĕçлев яма та май пур.

Ирина ПЕТРОВА