Иртнĕ шăматкун Вăрнарти тĕп больницăра Пĕрлехи диспансеризаци кунĕ иртнĕ. Пĕлтерĕшлĕ мероприятие округри çĕре яхăн çын хутшăннă. Çак кун кашниех профилактика медицина тĕрĕслевĕсем витĕр тухма тата чир-чĕр профилактики çинчен паха консультаци илме пултарнă.

Лабораторипе инструмент тĕпчевĕсен пĕтĕмлетĕвĕсем тăрăх, врачсем пациента диспансеризацин иккĕмĕш тапхăрĕ кирлине е профилактика мерисем кăна çителĕклине палăртаççĕ.

Диспансеризаци чирсене тата вĕсен аталанăвĕн факторĕсене маларахри тапхăрта тупса палăртма пулăшакан тĕллевлĕ профилактика программи шутланать.

Чылай чир шăпах пуçламăш тапхăрта ăнăçлă сипленет, çавăнпа диспансеризаци ирттерни сывлăх сыхлавĕн никĕсĕ пулса тăрать.

Мария СЕМЕНОВА, Вăрнар поселокĕнче пурăнаканскер:

- Диспансеризаци мана питĕ пысăк усă кÿчĕ. Пĕрремĕшĕнчен, 50 çулсенче уйрăм жалобăсем çук пулсан та профилактика тĕрĕслевĕсем витĕр тухмаллине пĕлтĕм. Сăмахран, эпĕ хамăн рациона тепĕр хут пăхса тухрăм пулин те, кашни кунах зарядка тусан та, кунсерен виçĕ километр уçăлса çÿреме тăрăшсан та ытлашши виçене мĕншĕн пăрахайманнине ăнлантăм. Ара щит евĕрлĕ парсен гормонĕсене йĕркене кĕртмелле тата артери пусăмне сăнаса тăмалла пулнă. Тăрăшсан пурте пулать! Сывлăхлă пуласси хамăртан килет.

2025 çулта «Вăрăм та хастар пурнăç» наци проекчĕ шайĕнче медицина мероприятийĕсене ирттересси малалла тăсăлать.

Елена ГРИГОРЬЕВА