Юлашки çулсенче нумай çамрăк арçынна «йăх паманлăх» диагноз лартаççĕ.

Яш чухнех тĕрлĕ партнерсемпе ар çыхăнăвне кĕни, пĕрмаях фастфуд çини, пирус туртни, эрех-сăрапа аташни, наркотиксемпе усă курни ырă тумасть. Сывă пурнăç йĕркине пăхăнни, сывлăха ачаранах тĕрĕслеттерни пĕлтерĕшлĕ.

Диспансеризацие 18-39 çулсенчисен виçĕ çулта пĕрре, 40 çултан иртнисен вара кашни çулах тухмаллла.

- Этемлĕхĕн вăйлă çурринчен чылайăшĕ сывлăха вăхăтра тĕрĕслеттермест, - теççĕ тухтăрсем.

Арçынсен репродуктивлă сывлăхне епле хаклаççĕ-ха/ Пĕрремĕш тапхăрта уролог тĕрĕслет, больницăра ку тухтăр çук пулсан хирург патне каймалла.

Пĕрремĕш тапхăр результачĕсем тăрăх, спермограмма, микрофлора тĕпчевĕсем, шăхчана УЗИ тутарма пултараççĕ.

Пĕтĕмĕшле диспансеризаци тухнă чухне 45, 50, 55, 60 тата 64 çулсенчи арçынсен ПСА шайĕ мĕн чухлине пĕлме вĕсен юнне анализ тăваççĕ.

Асра тытмалла: çăтă трусси, джинс шăлавар тăхăнни юн çаврăнăшне пăсать. Çакă ар органне сиен кÿрет. Синтетика материалĕнчен çĕленĕ япаласене нумай вăхăт тăхăнмалла мар.

Антонина ТАБАРДАК, медицина профилактикин тухтăрĕ