Тăван çĕршыв хÿтĕлевçин кунĕ - хăюлăх, паттăрлăх, патриотизм символĕ.

Эпир Раççей çарĕнче гражданла тивĕçе чыслăн пурнăçлакан хамăр ентешсемпе, ятарлă çар операцийĕнче хăюлăх кăтартакан, мирлĕ пурнăçшăн кĕрешекен çар çыннисемпе мăнаçланатпăр. Тăван çĕршывăн Аслă вăрçинчен таврăнман салтаксен ырă ячĕсене чĕререх упратпăр. Кăçал нимĕç фашисчĕсене çапса аркатнăранпа 80 çул çитет.

«Çĕнтерÿçĕ-ăру умĕнче пуç таятпăр», - терĕç Тăван çĕршыв хÿтĕлевçин кунĕ умĕн поселокри Асăну скверĕнчи Амăшĕпе Салтакăн палăкĕ умне пухăннисем.

Мероприятие округ пуçлăхĕ Надежда Никандрова, Вăрнар район прокурорĕ Сергей Парамонов, округ администрацийĕнче тăрăшакансем, тĕрлĕ ведомство ертÿçисем, территори пайĕсен пуçлăхĕсем хутшăнчĕç.

Амăшĕпе Салтакăн палăкĕ умне чĕрĕ чечексем хунă чух кашниех хумханчĕ. Фронтовиксен паттăрлăхĕпе хастарлăхне, тыл ĕçченĕсен çирĕплĕхĕпе чăтăмлăхне аса илсе пурте пĕр минут шăп тăчĕç.

Елена ПОРФИРЬЕВА