Нина ПАРАМОНОВА, вăрçă ачи, 89 çулта:

- Чăваш ен Пуçлăхĕн Олег Николаевăн ЧР Патшалăх Канашне янă Çырăвĕпе кăсăклансах паллашрăм.

Олег Алексеевич промышленноçри, производствăри, ял хуçалăхĕнчи, строительствăри кăтартăвĕсемпе республика Атăлçи федераци округĕнче малти вырăнсене йышăннине пĕлтерчĕ. Паллах, ку ырă хыпар пире те, аслă ÿсĕмрисене, хăйсен ĕмĕрне Чăваш ен ырлăхĕшĕн ĕçлесе ирттернĕ çынсене, савăнтарать.

Тăван çĕршывăн Аслă вăрçинче Çĕнтерÿ тунăранпа кăçал 80 çул çитет. Вăрçăра та, тылра та совет халăхĕ хăюлăхпа, иксĕлми тÿсĕмлĕхпе палăрнă. Фашистла Германие пула çав вăхăтри ачасен пурнăçĕ терт-асап айĕнче пулчĕ. Ман ачалăх та вăрçă çулĕсене килчĕ. Выçăллă-тутăллă, нушаллă пурнăç асран тухмасть. Мирлĕ тÿпе айĕнче пурăннине нимĕн те çитмест. Республикăра 42 пине яхăн «вăрçă ачи» пурăнать. Олег Николаев кашниех тимлĕхе тивĕç пулнине çирĕплетрĕ. Çĕнтерÿ кунĕ тĕлне хушма тÿлев уйăрни, паллах, «вăрçă ачисене» хавхалантарать.