Шуралман-ха шурăмпуçĕ,

Ялăм-йышăм вăранман,

Мир салтакĕ, çĕнтерÿçĕ,

Таврăнатăп эп çартан.

Таврăнатăп эп маттуррăн

Инçетри ют çĕрсенчен.

Ачаран палланă хурăн

Пуç таять çул хĕрринчен.

Саламларĕ юратуллă

Аслă хирĕм те мана,

Тулăх ÿснĕ сарă тулă

Савăнтарчĕ чунăма.

Тунсăхланă яш чĕремшĕн

Хаклă эсĕ, тăван хир!

Ăмăртса пĕр ĕçлемешкĕн

Тухăп хам та ыран ир.

Кăвак шуçăм кăвакарчĕ,

Кил умне пырса çитсен,

Кăвак çÿçлĕ ватă карчăк

Алăкра тăрать кĕтсе.

Ват аннеçĕм йĕрсе ячĕ,

Йĕрсе ячĕ чуптуса:

«Темиçе çул макăрманччĕ –

Халь йĕретĕп савăнса...

Тавтапуç, мухтавлă ывлăм,

Эс çĕнтертĕн тăшмана!»

Анне мар, Тăван çĕршывăм

Тав тăвать иккен мана.

Александр АРТЕМЬЕВ