Чăваш енри шкулсенче ашшĕ-амăшĕсен сообществисен пуçарăвĕсен конкурсĕпе 26 проект пурнăçа кĕрĕ. Вĕсем пĕтĕмĕшле 22 миллион тенке яхăн премие тивĕçнĕ!

«Ку - цифрăсем кăна мар, вĕренÿ хутлăхне аталантаракан тата ачасемпе çемьесене пулăшма май паракан чăн утăм. Чăваш енри кашни шкулта ашшĕ-амăшĕсен пĕрлĕхĕсем активлă ĕçлеççĕ. Иртнĕ çул Раççей Президенчĕн хушăвĕпе республикăри ашшĕ-амăшĕсен комитетне туса хутăмăр. Пĕрлехи ĕç кăтартăвĕсем аван: пирĕн шкулсемпе ашшĕ-амăшĕ хăйсене федераци шайĕнче тивĕçлĕ кăтартрĕç»,- палăртать Чăваш ен Пуçлăхĕ Олег Николаев.

Палăртма кăмăллă - Вăрнарти 2-мĕш вăтам шкул та 1 миллион тенке яхăн тата Ярмушка шкулĕ 500 пин тенкĕлĕх гранта выляса илнĕ.

Конкурса вăрнарсем «Пĕлÿ коридорĕпе çулçÿреве» проектсене тăратнă. Çĕнсе илнĕ укçа-тенкĕпе шкулăн картлашка площадкисене илемлетĕç, коридорсене çĕнетĕç, вĕсенче пĕчĕк дивансемпе пуфиксем вырнаçтарĕç, стендсем йĕркелĕç тата ытти те.

Ярмушкасем «Ачасемпе ашшĕ-амăшĕсем çĕр каçмалли турист велопохочĕсем» йĕркелесшĕн. Çакă ачасен тавракурăмне ÿстерессе, хутшăнусене çирĕплетессе шанаççĕ.

Саламлатпăр!

Конкурса Раççей Çутĕç министерстви пулăшнипе «Знание» общество йĕркеленĕ.

Светлана ЧИКМЯКОВА