Цифра аталанăвĕн министерстви пĕлтернĕ тăрăх, май уйăхĕн 1-мĕшĕ тĕлне Чăваш енри 86 пин те 482 çын хăйсене кредитсем парас тĕлĕшпе чарусем лартнă. Ку çĕнĕлĕхпе чи активлă усă куракан ушкăн - 35-45 çулсенчи граждансем.

Аса илтеретпĕр, харпăр хăйне кредитсем тата займсем илес тĕлĕшпе чару çирĕплетме май паракан сервис Патшалăх тивĕçтерĕвĕсен порталĕнче кăçалхи мартăн 1-мĕшĕнчен ĕçлесе кайнă. Вăл «Даннăйсен экономики тата патшалăхăн цифра трансформацийĕ» наци проекчĕпе пурнăçланать. Финанс саккунĕсенчи ку çĕнĕлĕх çынсене мушенниксен киревсĕр ĕçĕсенчен - ултавлă майпа уйрăм даннăйсене пĕлсе вĕсен ячĕпе ссуда илессинчен - хÿтĕлес тĕллевлĕ.

Чарăва лартас тесен Порталти Уйрăм кабинета кĕмелле, унта «Самозапрет» пункта тупмалла. Çакăн хыççăн ăна тĕрĕслев кочĕ пулăшнипе çирĕплетмелле. Пĕр-пĕр çынна çĕнĕ кредит парас умĕн вара банксем е кредит организацийĕсем унăн кунашкал чару пуррине е çуккине тĕрĕслеме тивĕçлĕ.

Ирина ЯКОВЛЕВА