Строительство министерстви пĕлтернĕ тăрăх, тăватă уйăхра Чăваш енре çĕнĕ çурт-йĕре хута ярассипе кăçалхи планăн 45 процентне пурнăçланă ĕнтĕ. Ку енĕпе лидерсем - Шупашкарпа Çĕнĕ Шупашкар хулисем, Шупашкар тата Канаш округĕсем.

Январь-апрель уйăхĕсенче ку кăтарту 367,2 пин тăваткал метрпа танлашнă. Мĕнпур калăпăшран 232,9 пинĕшĕ уйрăм çурт-йĕр строительствине тивет, 134,3 пин тăваткал метрĕ - нумай хваттерлĕ çуртсем.

Каласа хăвармалла, пĕтĕмĕшле «Пурнăç инфратытăмĕ» наци проекчĕ йĕркипе республикăра кăçал 818 пин тăваткал метр çурт-йĕр çĕклесе хута яма пăхнă.

- Строительство секторне хавхалантарас тĕллевпе Чăваш ен «Пурăнмалли вырăнсенче инфраструктурăна аталантарасси» çĕнĕ федераллă проект йĕркипе те инфраструктура бюджет кредичĕсене тухăçлă усă курать. Виçĕ çулта ку укçа-тенкĕпе инженери инфраструктурин 32 объектне хута янă. 2025 çулхи планра - 16 объектри строительствăна вĕçлесси, - палăртнă Чăваш ен строительство министрĕ Владимир Максимов.

Ирина ЯКОВЛЕВА